noticia

Rexistros 1 a 30 de 2299
28/09/2022

Un ciclo de cine aborda as situacións de conflito a partir do territorio e a identidade

Nalgures é un ciclo de cinema e conversas que se achega a momentos de conflito a partir de conceptos como territorio, memoria e identidade. A proposta xorde como actividade paralela á exposición homónima de Narelle Jubelin (Sidney, Australia, 1960). É froito dunha colaboración entre o Centro Galego de Arte Contemporánea e o Consello da Cultura Galega (CCG), que implica a presenza da fotógrafa catalá Anna Turbau, que retratou a transición en Galicia e cuxo fondo está en depósito no CCG.
28/09/2022

A biografía de Cristina Reges incorpórase ao Álbum de Galicia

Filla da diáspora galega, a vida de Cristina Reges (Bos Aires, 1957 - 2015) estivo marcada polo recordo dunha galeguidade que impregnou a súa propia identidade e que a levou a involucrarse en numerosas actividades a prol dos dereitos das mulleres migrantes. Micaela Fernández Darriba é a autora da súa entrada no Álbum de Galicia.
27/09/2022

O ciclo Revisando a nosa arte regresa cunha xornada dedicada á figura de Julia Minguillón

Julia Minguillón foi unha das grandes pintoras da posguerra e unha das poucas artistas galegas que transcenderon a nivel nacional. Porén, malia contar cunha traxectoria detacada, cunha técnica brillante e unha paleta e estilo moi persoais aínda permanece descoñecida para o gran público. Co fin de divulgar a súa figura, a Sección de Creación e Artes Visuais Contemporáneas do Consello da Cultura Galega (CCG) dedícalle mañá, 28 de setembro, unha xornada do ciclo Revisando a nosa arte, que regresa despois do verán. A sesión é presencial e pode seguirse en directo a través do sitio web e as redes sociais da institución.
22/09/2022

Unha xornada aborda o nesgo de xénero na medicina desde Xinzo

Invisibilizadas para a medicina é o título da xornada que organizan o Consello da Cultura Galega (CCG) e a Valedora do Pobo mañá, venres 23 de setembro ás 16:00 horas, en Xinzo de Limia. A iniciativa ten como finalidade abordar o nesgo de xénero que existe na sanidade e que contribúe a consolidar como única medida de análise, diagnóstico e tratamento a perspectiva masculina. A directora do Centro de Documentación en Igualdade e Feminismos, Carme Adán; a alcaldesa de Xinzo de Limia, Elvira Lama, e a valedora do Pobo, Dolores Fernández Galiño, serán as encargadas de inaugurar esta cita que non se poderá seguir en directo, pero será gravada e estará proximamente dispoñible na hemeroteca do CCG.
22/09/2022

O centenario da asociación do Partido de Corcubión en Bos Aires centra o especial Historias de ida e Volta

O 26 de agosto de 1922 un grupo de emigrantes naturais dos concellos do partido xudicial de Corcubión que residían en Bos Aires reuníronse para constituír unha asociación con fins agraristas e instrutivos. Nacía así a Asociación Benéfica Cultural del Partido de Corcubión, que continúa activa. A súa historia, os fitos máis destacados, así como a publicación que mantén, centra o novo especial de Historias de ida e volta, proxecto do Arquivo do Emigración (AEG) do Consello da Cultura Galega (CCG) co apoio da Secretaría Xeral da Emigración. Vinte imaxes e documentos permiten coñecer esta sociedade de emigrantes que cumpre cen anos.
22/09/2022

O Consello da Cultura Galega celebra en Frankfurt o Día Europeo das Linguas

Todas as voces a voz. Poesía en español, catalán, éuscaro, galego e alemán, é o título do acto que acollerá a sede do Instituto Cervantes de Frankfurt o vindeiro luns, 26 de setembro de 2022, para conmemorar o Día Europeo das Linguas. A xornada está organizada polo Consello de Cultura Galega (CCG), o Etxepare Euskal Institutua, o Institut Ramon Llull e o Instituto Cervantes. A presidenta da institución, Rosario Álvarez, asistirá ao acto no que a poesía galega estará representada por Yolanda Castaño. O acto poderá seguirse en directo a través do sitio web e das redes sociais do Instituto Cervantes.
21/09/2022

A biografía de María Luisa Viqueira entra no Álbum de Galicia

A vida de María Luisa Viqueira López-Cortón (Bergondo, 1888-Cidade de México, 1974) foi un constante ir e vir, sempre moi vencellada á educación no que o seu home, Rubén Landa, e o seu irmán, Xohán Vicente Viqueira, foron figuras destacadas. Patricia Arias Chachero é a autora da súa entrada no Álbum de Galicia.
20/09/2022

Regresa o ciclo Pensarmos cunha conferencia sobre a discriminación no dereito

A filósofa do dereito Maggy Barrère (Donostia, 1957) participa mañá, mércores 21 ás 18:00 horas, no ciclo de reflexión Pensarmos cunha conferencia titulada Dereitos e discriminación na “nova normalidade”: unha mirada iusfeminista. A súa intervención desenvolverase en formato dialogado co maxistrado Xermán Varela. A iniciativa, coordinada por Celia Pereira Porto, enmárcase dentro das actividades da Sección de Pensamento do Consello da Cultura Galega (CCG). A sesión é presencial, pero poderá seguirse en directo a través do sitio web e das redes sociais da institución.
20/09/2022

O Consello da Cultura Galega colabora co XIII Congreso da Asociación Internacional de Estudos Galegos

A presidenta do Consello da Cultura Galega (CCG), Rosario Álvarez, inaugura este mércores (21 de setembro, 18:30 horas) na sede do Instituto Cervantes de Polonia a exposición Galicia imaxinada, que retrata a Galicia dos emigrantes a través de vinte paneis que permiten visualizar a influencia da emigración na creación da imaxe de Galicia en no século XIX. A exposición forma parte do programa do XIII Congreso da Asociación Internacional de Estudos Galegos que se desenvolve na Universidade de Varsovia ata o 24 de setembro. No marco desta cita, que leva por título “Abrindo Rutas, Expandido Camiños. Novas perspectivas e interseccións nos Estudos Galegos”, o CCG promove un panel sobre a internacionalización da literatura galega e a proxección do filme de Eloy Enciso Longa noite.
20/09/2022

O alumnado do colexio arxentino galego Santiago Apóstol visitou a sede da insittución

O alumnado de 5º ano do Colegio Argentino Gallego Santiago Apóstol de Buenos Aires visitou hoxe a sede do Consello da Cultura Galega, no Pazo de Raxoi en Santiago de Compostela, onde foron recibidos polo secretario, Silvestre Gómez Xurxo, e o técnico Manuel Gago. Os alumnos, en viaxe de estudos por Galicia, coñeceron distintos aspectos do traballo e as actividades da institución.
16/09/2022

Unha xornada analiza a internacionalización da cultura galega a partir das viaxes da Xeración Nós

Florentino López Cuevillas, Castelao, Ramón Otero Pedrayo, Jesús Bal y Gay ou Vicente Risco son algúns nomes destacados da Xeración Nós. As súas viaxes, reais e literarias, serviron para situar a cultura galega en pé de igualdade con outras culturas. Sobre esas viaxes, a súa importancia e as consecuencias que tiveron, afonda a xornada Os camiños de Nós polo mundo que o Consello da Cultura Galega e a Fundación Vicente Risco organizan en Allariz este sábado 17 de setembro. A presidenta do CCG, Rosario Álvarez, xunto coa alcaldesa, Cristina Cid Fernández e a presidenta da Fundación Vicente Risco, Celia Pereira Porto, serán as encargadas de inaugurar esta cita que será gravada e se subirá á rede con posterioridade.
15/09/2022

O Repertorio de Prensa da Emigración incorpora 25 números da publicación Alborada

O 26 de agosto cumpríronse cen anos da creación da Asociación Benéfica e Cultural do Partido de Corcubión en Bos Aires. Unha sociedade que edita a publicación Alborada, da que incorporamos 25 números ao Repertorio de Prensa da Emigración. Nesta ocasión subimos números que van desde os anos 40 ata os 70, período no que mantivo unha periodicidade irregular. Estas publicacións foron depositadas no Arquivo da Emigración Galega por Xosé María Rei Lema e Marcelino Fernández Santiago.
15/09/2022

Chega a Vigo a mostra Sen Cancelas que amosa a diversidade sexual

A presidenta do Consello da Cultura Galega, Rosario Álvarez; a coordinadora do comité asesor que deseñou os contidos, Carme Adán; un dos comisarios, Enrique Latorre, e Euloxio Santos, director do IES Politécnico de Vigo (xoves 15, 11:00 horas) inauguraron hoxe neste centro a exposición Sen cancelas. Memorias do arco da vella en Galicia. Trátase da primeira itinerancia dunha mostra elaborada cun marcado carácter didáctico e divulgativo e fai un percorrido histórico e conceptual sobre a diversidade sexual en Galicia.
14/09/2022

Una xornada aborda a proxección exterior das literatura infantil e xuvenil en clave feminina

María Alonso Seisdedos, Fina Casalderrey e Ledicia Costas son tres escritoras galardoadas cun Premio Nacional de Literatura e ambas as tres son autoras destacadas da nosa literatura infantil e xuvenil. Todas elas participan na sesión titulada “Novas voces, éxitos eternos. Os premios nacionais levan nome de muller (parte II)” que terá lugar mañá xoves (17:30 horas) no Consello da Cultura Galega (CCG). É a segunda sesión do ciclo Literarias todas, coordinado por Inma López Silva e organizado polo Centro de Documentación en Igualdade e Feminismos (CDIF), co que se busca reflexionar sobre a posición das mulleres dentro do sistema literario galego. A xornada é presencial pero pode seguirse en directo a través do web e das redes da institución.
14/09/2022

O Álbum de Galicia incorpora as entradas de Marcial del Adalid e Pucho Boedo

O Álbum de Galicia, colección bibliográfica que mantén o Consello da Cultura Galega (CCG), vén de incorporar as entradas de dúas figuras destacadas para a música galega. Dunha banda, Marcial del Adalid (A Coruña, 1826- Lóngora, Oleiros, 1881) un compositor e precursor na procura do son de Galicia. Da outra, Pucho Boedo (A Coruña, 1826-1986), o crooner eterno. Laura Touriñán e Fernando Fernández Rego son os autores das entradas que xa se poden consultar.
13/09/2022

O II Festival de Filosofía de Galicia renderá homenaxe ás filosofas

A banalidade do mal, frase acuñada pola filosofa Hannah Arendt, abre en Compostela o programa da segunda edición do Festival de Filosofía de Galicia. Un encontro organizado polo Consello da Cultura Galega (CCG) que mestura conferencias e espectáculos para convidar ao público a pensar e a facelo cun punto de vista distendido. A presidenta do CCG, Rosario Álvarez, xunto coa directora do encontro, Carme Adán, explicaron en rolda de prensa o programa, que este ano está dedicado ás filosofas. A cita desenvólvese en Compostela e como novidade, ábrese á cidade de Ourense onde están programados varios espectáculos.
12/09/2022

A presidenta e a Comisión Executiva reúnense co presidente do Parlamento de Galicia

A presidenta do Consello da Cultura Galega (CCG), xunto coa Comisión Executiva da institución, reuníronse esta mañá co presidente do Parlamento de Galicia, Miguel Ángel Santalices. A xuntanza foi solicitada polo CCG trala reelección da súa presidenta e o nomeamento da nova executiva para abordar os futuros proxectos desta institución.
09/09/2022

Reeditado o primeiro poemario de Cabanillas no marco da colección Clásicos da Emigración

No desterro é o primeiro poemario de Ramón Cabanillas. Veu a luz na Habana cun limiar de Basilio Álvarez, e consagrou o autor como poeta social por excelencia. O Consello da Cultura Galega (CCG) e a Secretaría Xeral da Emigración, no marco da súa colección Clásicos da Emigración, presentaron este venres no Museo Ramón Cabanillas de Cambados a reedición da obra cun estudo crítico. No acto participaron Xosé Manoel Núñez Seixas, vicepresidente do CCG e director do Arquivo da Emigración Galega; María Baleato, subdirectora de Coordinación Administrativa da Secretaría Xeral da Emigración; Miguel Cabo, autor do estudo da obra e profesor da USC; Francisco Fernández Rei, membro da Real Academia Galega; Tino Cordal, concelleiro de Cultura de Cambados; e Pitusa Vidal Cabanillas, neta do autor.
08/09/2022

O Consello da Cultura Galega e a Asociación Irimia poñen na rede os fondos da revista de pensamento cristiá

A presidenta do Consello da Cultura Galega, Rosario Álvarez, e a presidenta da Asociación Irimia, Lucía Santiago, asinaron este xoves o acordo para a dixitalización e posta na rede do arquivo completo de Irimia. Semanario de Crentes Galegos desde o seu nacemento no ano 1981. A sinatura produciuse na sede do CCG na véspera da XLIV Romaxe de Crentes Galegos, que terá lugar este sábado en Culleredo.
07/09/2022

A biografía do fotógrafo Ricard Terré incorpórase ao Álbum de Galicia

Catalán de nacemento (Sant Boi de Llobregat, 1928), Ricard Terré pódese considerar un galego de adopción, xa que as últimas dúas terceiras partes da súa vida transcorreron no noso país, lugar onde xerou unha extensa obra. Nela destaca unha fonda capacidade de achegamento á terra e á cultura galega desde unha ollada humanista cun estilo moi marcado e contemporáneo. O fotógrafo Vítor Vaqueiro asina a súa entrada no Álbum de Galicia.
06/09/2022

O novo especial de Proxector compila vídeos que afondan na renovación da educación

Creatividade, o ensino personalizado, o talento, a diversidade...son moitas e moi variadas as miradas sobre a educación. O novo especial de Proxector, iniciativa que desenvolvemos coa USC, compila vídeos de conferencias e proxectos que apuntan a mellorar o ámbito educativo.
05/09/2022

A Presidenta e a Comisión Executiva reúnense con Alfonso Rueda, presidente da Xunta

A presidenta do Consello da Cultura Galega, Rosario Álvarez, acompañada da nova Comisión Executiva, reuniuse esta mañá con Alfonso Rueda Valenzuela, presidente da Xunta de Galicia e presidente de honra do CCG. Na xuntanza falouse da situación actual do sector, da importancia da cooperación en material cultural e dos retos de futuro.
02/09/2022

O Consello da Cultura Galega lembra a Antolín Faraldo no bicentenario do seu nacemento

Hoxe, 2 de setembro, é o bicentenario do nacemento de Antolín Faraldo (Betanzos, 1823- Granada, 1853). Manuel Murguía dixo del que "fue el primero y el mejor". O primeiro en marcar o horizonte do autogoberno galego; o mellor porque se entregou até coa alma pola liberdade malia padecer persecución, censura, exilio e represión. A súa entrada, asinada por Xurxo Martínez, acaba de incorporarse ao Álbum de Galicia, colección biobibliográfica que mantén o Consello da Cultura Galega (CCG).
01/09/2022

O Consello da Cultura Galega colabora co Festiletras cun espectáculo sobre a orixe da auga salgada

O Consello da Cultura Galega (CCG) colabora un ano máis co Festiletras, festival organizado pola Fundación Eduardo Pondal na Aldea do Couto (Ponteceso). Nesta ocasión faino co espectáculo dos Quinquilláns Por que é salgada a auga do mar?. A función terá lugar este venres (2 de setembro) na eira da Praza do Quinteiro.
31/08/2022

O Álbum de Galicia incorpora a entrada de Urbano Feijoo

Urbano Feijoo Sotomayor (1808-1898) foi un controvertido empresario e político galego que promoveu a creación dun plan de colonización que facilitase, en termos xurídicos, económicos, filantrópicos e prácticos a chegada a Cuba de galegos. O operativo rematou cun grande escándalo polo trato denigrante dispensado aos traballadores. O Álbum de Galicia vén de incorporar a súa biografía asinada pola escritora Elisa Vázquez de Gey, gran coñecedora da súa figura e da vida cotiá e política da vida colonial da illa de Cuba.
21/07/2022

O Consello da Cultura Galega e o Museo Larreta exhiben en Bos Aires un retrato completo da obra plural de Luís Seoane

Luís Seoane (Bos Aires, 1910- A Coruña, 1979) naceu coa marca gravada da emigración, impresa polos seus pais que se asentaron na capital Arxentina. Décadas máis tarde engadiu a do exilio, que o levou de Galicia á súa cidade natal, reconvertida nunha da capitais da arte contemporánea. Ese dupla ancoraxe xeográfica e cultural influíu nun Seoane viaxeiro, en permanente busca creativa e experimental sempre marcado pola teima de achegar a cultura á cidadanía. O relato completo do polifacético creador pódese ver en Materiais Seoane. Entre Galicia e Arxentina que inaugurou este xoves a presidenta do Consello da Cultura Galega, Rosario Álvarez, a directora xeral de Patrimonio, Museos y Casco histórico da Ciudad de Buenos Aires, Martina Magaldi; o secretario xeral da Emigración, Antonio Rodríguez Miranda, e a directora do museo Larreta, Delfina Helguera, coa presenza de Silvia Dolinko, comisaria da exposición xunto con Pablo García Martínez, máis numerosas autoridades e personalidades locais. A mostra estará aberta ata o 27 de novembro no Museo de Arte Español Enrique Larreta.
13/07/2022

O Álbum de Galicia suma a entrada do fotógrafo Jaime Pacheco

A nova entrada do Álbum de Galicia incorpora a figura de Jaime Pacheco (Freixo de Espada à Cinta, Tras os Montes-Bragança, 1878 – Vigo, 1954) a cabeza visible dun dos estudos fotográficos máis senlleiros de Galicia. Unha entradada que asina o fotógrafo Vítor Vaqueiro.
12/07/2022

O ciclo "Analizando a arte" revisa o compromiso artístico de Arturo Souto

Arturo Souto Feijoo (Pontevedra, 1902- México D.F., 1964) foi un dos artistas máis destacados e innovadores da chamada xeración de “Os renovadores”. Sobre a súa traxectoria e o compromiso social da súa obra afonda a xornada deste mércores do ciclo “Revisando a nosa arte”, co que a Sección de Creación e Artes Visuais Contemporáneas do Consello da Cultura Galega (CCG) revisa mensualmente a traxectoria de personalidades destacadas da nosa arte. A sesión é presencial pero pode seguirse en directo desde o web e as redes sociais da institución.
12/07/2022

A mostra "A parroquia para sempre" amosa a vida rural do interior de Galicia nos anos 50

O militar e fotógrafo afeccionado Jesús Faílde Oro retratou os seus veciños da aldea de Friufe, en Agolada (Pontevedra) durante os anos cincuenta. Un traballo que permite coñecer a vida cotiá desta parroquia pontevedresa no seu traballo diario pero tamén nas súas celebracións. Unha escolma dese arquivo pódese ver en A parroquia para sempre. Jesús Faílde Oro. Memoria gráfica das xentes de Agolada (1950-1960) que o xerente do Consello da Cultura Galega (CCG), Marcelino Fernández; o alcalde do concello de Agolada, Luis Calvo; e os representantes do Colectivo Baluarte dos Pendellos, Manuel Busto e Xaime Varela, xunto co autor inauguraron esta mañá en Agolada. A exposición tamén se pode ver en liña no sitio web do CCG.
12/07/2022

A presidenta Rosario Álvarez inicia unha viaxe institucional a Bos Aires

A presidenta do Consello da Cultura Galega, Rosario Álvarez, inicia unha viaxe institucional na que contribúe ao fortalecemento da cultura galega no exterior. A viaxe arrinca este mércores co acto de entrega a Rosario Álvarez do título “Huésped de honra” a cargo Legislatura da Cidade Autónoma de Bos Aires. Reunións con diferentes institucións e conferencias conforman a axenda que conclúe o día 21 coa inauguración da exposición Materiais Seoane. Entre Galicia e Arxentina no Museo de Arte Español Enrique Larreta.