noticia

Rexistros 1 a 30 de 2907
13/02/2025

O Repertorio da prensa da emigración galega amplíase coa revista Vivero en Cuba

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de febreiro novos números de Vivero en Cuba, publicación oficial da Sociedade de instrución "Vivero y su comarca". Sociedade que naceu coa vontade, segundo os seus Estatutos, de “construir edificios para escuelas en todas las parroquias de los Ayuntamientos de Vivero, Orol, Muras, Riobarba, Jove y Cervo, y crear una escuela de Artes y Oficios”.
12/02/2025

Unha xornada reflexiona sobre a medicina personalizada

O Consello da Cultura Galega (CCG), coa colaboración da Fundación Xenoma Galicia, organizan este xoves, 13 de febreiro (16:30 horas) a xornada “Proxecto Xenoma Galicia” que trae a especialistas para falar das oportunidades que nos ofrece a medicina personalizada, así como da posta en marcha da iniciativa. A xornada, organizada por Anxo Carracedo e María Brión, ten as prazas esgotadas pero pode seguirse a través do web do CCG e das redes sociais da institución.
12/02/2025

O Álbum de Galicia incorpora unha nova entrada de Castelao

“Xenio e figura da nación galega”. Así define Henrique Monteagudo a Alfonso Daniel Rodríguez Castelao (Rianxo, 1886 - Bos Aires, 1950) na entrada que acaba de elaborar para o Álbum de Galicia, colección de biografías dixitais que mantén o Consello da Cultura Galega (CCG). Nela fai un percorrido sobre a biografía do recoñecido intelectual, artista plástico, escritor e dirixente político, ao que considera “un referente indiscutido do galeguismo e do nacionalismo, un clásico das letras galegas e unha das figuras máis representativas da Galicia contemporánea”.
12/02/2025

Profesionais do sector da danza preparan un informe e instan ás administracións a un apoio estable

Representantes de diferentes iniciativas independentes de artes do movemento e performativas que existen no país, así como responsables do sector público vencellados a este sector reuníronse este mércores no Consello da Cultura Galega (CCG), no marco dunha xornada coordinada pola Sección de Artes Escénicas, Musicais e Audiovisuais co apoio da Fundación María Jose Jove, para demandar un maior apoio ao sector. “É unha xornada especial que procura un espazo de encontro” afirmou a presidenta do CCG, Rosario Álvarez, na presentación desta cita que tamén forma parte dun itinerario de traballo que rematará a finais de 2025 coa elaboración dun informe deste sector.
11/02/2025

O especial Proxector achégase ao patrimonio inmaterial das nosas festas

Antroido, entroiro, entruido, entrudio... son moitas as formas para designar a unha das manifestacións máis sobranceiras do noso patrimonio cultural inmaterial: o entroido tradicional. A nova entrega de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), escolma este mes unha ducia de vídeos para achegarse ás diferentes formas de celebración baixo o título “Cando o pobo vai de festa: celebracións e patrimonio inmaterial”.
11/02/2025

Unha xornada analiza diferentes iniciativas das artes do movemento

A Casas Vella, Residencias paraíso, Atopémonos bailando.... son varias as iniciativas independentes que existen en Galicia de apoio á danza e ás artes performativas e do movemento. Todas elas estarán presentes na xornada “Iniciativas independentes de apoio á investigación e creación en danza e artes performativas en Galicia” que se desenvolve este mércores (9:30 horas) e que pretende visibilizalas, reflexionar sobre o seu impacto no territorio e a súa relación coa política cultural pública, tanto local como estatal. A sección de Artes Escénicas, Musicais e Audiovisuais do Consello da Cultura Galega (CCG), coa colaboración da Fundación María José Jove, organiza esta cita coordinada por Natalia Balseiro, Susana González e Caterina Varela. A cita é presencial e pode seguirse en directo desde o web do CCG.
10/02/2025

A institución expresa o seu fondo pesar polo pasamento de Xosé Vizoso

O Consello da Cultura Galega (CCG) expresa o seu fondo pesar polo pasamento do artista Xosé Vizoso (Mondoñedo, 1950- Brión, 2025), figura destacada das artes gráficas en Galicia. Na madrugada do sábado ao domingo finou este prolífico cartelista, muralista, escultor e ilustrador de libros. A súa obra destacou polo seu poderío visual e a profunda raigame coa imaxinería e a cultura tradicional galega. Ten unha ampla traxectoria como deseñador e ceramista en Sargadelos e, entre os seus recoñecementos, destaca o Premio Nacional de Escultura que recibiu en 1968.
10/02/2025

Un volume colectivo afonda no legado do Seminario de Estudos Galegos

En 1923 un grupo de estudantes idealistas, serios e comprometidos coa súa nación puxeron en marcha unha brillante aventura científica, política, e mesmo artística, ao abeiro da universidade. Foi o Seminario de Estudos Galegos (SEG). A importancia daquel proxecto, a súa comparación con entidades análogas e a relevancia do seu legado está presente no volume que vén de editar o Consello da Cultura Galega (CCG) baixo o título Saber de Nós. O Seminario de Estudos Galegos. “É unha obra colectiva con olladas que se cruzan para facer balance e valorar o legado que se foi construíndo” asegurou a presidenta do CCG, Rosario Álvarez, na presentación do volume á que asistiron os dous editores, Henrique Monteagudo e Ramón Villares, máis outros autores participantes como Alfonso Mato ou Francisco Díaz-Fierros. O libro xa se pode descargar desde o web da institución.
06/02/2025

Unha xornada homenaxea a María Xosé Queizán, pioneira do feminismo galego

“Tocoume ser das primeiras por idade e por curiosidade” afirmou María Xosé Queizán na homenaxe que lle dedicou o Centro de Igualdade e Feminismos (CDIF) do Consello da Cultura Galega (CCG) no día en que cumpría 86 anos. A presidenta, Rosario Álvarez, abriu esta cita que serviu tamén para poner de manifestó a relevancia da súa obra e a vixencia do seu pensamento.
05/02/2025

O Álbum de Galicia incorpora a entrada do fotógrafo Virxilio Viéitez

Virxilio Viéitez (Soutelo de Montes, Forcarei, 1930-2008) foi “o fotógrafo da individualidade e do infinito universo humano”. Así o define Vítor Vaqueiro, autor da entrada do fotógrafo forcareiés que se acaba de incorporar ao Álbum de Galicia, colección de biografías dixitais que mantén o Consello da Cultura Galega (CCG).
05/02/2025

O Arquivo Sonoro de Galicia percorre a historia do rexistro do son no país cunha xornada

De Domingo Martínez de Presa ata Ana Kiro pasando por Maruxa Boga, Maruxa Villanueva, Pedro Ferrer, Perfecto Feijoo.... son moitos os nomes propios que forman parte da historia do rexistro sonoro en Galicia. Sobre eles falarase este xoves (17:00 horas) na xornada “A arte do rexistro sonoro en Galicia: dispositivos, espazos e personaxes“ que organiza o Arquivo Sonoro de Galicia, centro do Consello da Cultura Galega (CCG). A presidenta da institución, Rosario Álvarez, máis o coordinador da xornada e director do ASG, Alejo Amoedo, inauguran esta cita que contará coa participación de Carlos Martín e Julio Gómez. A sesión é presencial pero pódese seguir en directo desde o web do CCG.
04/02/2025

O CDIF homenaxea a María Xosé Queizán

"Recuperemos as mans" é o primeiro ensaio de María Xosé Queizán que viu a luz en 1980. É tamén o título da xornada coa que o Centro de Documentación en Igualdades e Feminismos (CDIF) do Consello da Cultura Galega (CCG) homenaxea á autora este mércores 5 de febreiro (16:45 horas). Carme Adán, Marga do Val e Helena Fernández participan nesta cita que pretende recuperar a vixencia das argumentacións ao tempo que serve de recoñecemento do relevancia da súa escrita hai 45 anos. A presidenta, Rosario Álvarez, inaugura este encontro ao que asiste a homenaxeada e se pode seguir en directo polo web da institución.
01/02/2025

Posta na rede unha nova dixitalización da voz de Castelao

O Consello da Cultura Galega (CCG) pon na rede o único documento sonoro conservado de Alfonso Daniel Rodríguez Castelao (Rianxo, 1886- Bos Aires, 1950). Trátase da mensaxe que o intelectual gravou en fonopostal na Central de Correos de Bos Aires, co gallo da estrea de “Os vellos non deben de namorarse”, no Teatro Solís de Montevideo o 8 de outubro de 1941 á que el non podía asistir. Esa gravación foi obxecto dunha nova dixitalización en decembro de 2024 e é, ata o momento, o único rexistro coñecido da voz de Castelao. Engádese ao especial que o CCG puxo en marcha ao inicio deste ano en que se conmemora o 75 cabodano do intelectual.
30/01/2025

Un especial difunde unha colección de carteis de Xosé Vizoso no Día da Ilustración

Este xoves, 30 de xaneiro, celébrase o Día da Ilustración que nesta edición se lle dedica a Xosé Vizoso (Mondoñedo, 1950). O Consello da Cultura Galega (CCG) súmase á efeméride convocada pola Asociación Galega de Profesionais da Ilustración (AGPI), coa posta na rede do fondo Colección de Carteis da Queimada Popular de Cervo. Son 27 carteis deseñados por Xosé Vizoso nos que se pode ver a evolución do seu característico estilo.
29/01/2025

A biografía de Tucho Lagares incorpórase ao Álbum de Galicia

O Consello da Cultura Galega (CCG) incorpora hoxe ao Álbum de Galicia, colección de biografías dixitais, a entrada do actor coruñés Antonio "Tucho" Lagares (A Coruña, 1932-2013). Foi un dos pioneiros do audiovisual galego que deixou a súa pegada en diferentes medios escénicos e artísticos. A entrada foi escrita por Ana Abad de Larriva.
28/01/2025

O ciclo “Arte en tempo real” chega ao seu ecuador cunha análise da situación das galerías

A terceira xornada do ciclo “Arte en tempo real” reflexiona este mércores 29 de xaneiro (17:00 horas) sobre a situación das galerías de arte no contexto actual. A sesión está coordinada por Lucía Pita e nela participan os responsables das galerías galegas Metro e Dupla, máis a asturiana Llamazares. A xornada, organizada pola Sección de Creación e Artes Visuais Contemporáneas que coordina Paula Cabaleiro, é presencial e pode seguirse en directo a través do web e das redes sociais da institución.
22/01/2025

O Álbum de Galicia suma a entrada do cronista mindoniense Eduardo Lence Sartar

Eduardo Lence Santar (Mondoñedo, 1876 - 1960) “é un dos máis notables estudosos da Galicia norlucense”. Así o afirma Armando Requeixo na súa entrada biográfica que hoxe se incorpora ao Álbum de Galicia, colección dixital do Consello da Cultura Galega (CCG).
22/01/2025

O ciclo Pensarmos regresa con Margot Rot e unha conferencia sobre a infoxicación

A escritora e filósofa Margot Rot (Xixón, 1997) reflexionará este xoves 23 (a partir das 18:00 horas) no Consello da Cultura Galega (CCG) como lle afectan ás nosas emocións e á nosa identidade o uso das tecnoloxías. É na sesión titulada “INFOXICACIÓN: e se a indiferenza é unha consecuencia sistémica?” que forma parte do ciclo Pensarmos co que a Sección de Pensamento da institución propón reflexionar sobre cuestións de actualidade. A cita, coordinada por Celia Pereira Porto, emítese en directo desde o web e as redes sociais da institución.
21/01/2025

Un informe do Observatorio da Cultura Galega demanda a creación dun plan de museos

Galicia conta cunha gran riqueza de museos ou coleccións museográficas que responden a unha realidade moi diversa en canto a tamaño, recursos e públicos. Dez teñen máis de 600.000 euros de orzamento, mentres o 34% dispoñen de menos de 50.000 euros. A súa evolución nos últimos vinte anos é obxecto de estudo en ”Análise da situación dos museos e outros centros museísticos en Galicia”, documento de traballo elaborado polo Observatorio da Cultura Galega, servizo dependente do Consello da Cultura Galega (CCG). A presidenta da institución, Rosario Álvarez, destacou na rolda de prensa celebrada esta mañá na sede da institución que o informe revela unha das grandes fortalezas “temos un patrimonio cultural rico e diverso, unha base sólida sobre a que construír iniciativas de investigación, documentación, conservacións, educación e difusión”. Nesta diagnose, o coordinador do Observatorio da Cultura Galega, Häkan Casares, apuntou que os expertos consultados para a elaboración deste informe sinalan que a centralización da xestión limitou a autonomía dos museos e cómpre deseñar unha estratexia para evitar convertelos en recursos turísticos e exposicións temporais.
21/01/2025

O Arquivo da Emigración Galega pon na rede fondos da asociación Hijos del Ayuntamiento de Boiro

Un grupo de emigrantes de Boiro, comandados por Benigno del Río, funda en Bos Aires en 1931 a entidade “Sociedad Hijos de Parroquias Unidas del Ayuntamiento de Boiro” co obxectivo de crear unha escola e unha biblioteca circulante para achegar a lectura a todos os veciños da súa terra natal. Documentación desta sociedade, hoxe activa baixo o nome “Hijos del Ayuntamiento de Boiro”, conforma a nova entrega do proxecto Memoria documental das sociedades da emigración galega, co que o Arquivo da Emigración Galega, servizo do Consello da Cultura Galega (CCG), visibiliza fondos documentais das entidades microterritoriais creadas na diáspora galega
20/01/2025

Documentación inédita da primeira homenaxe a Castelao abre un espazo web específico

A finais de setembro de 1975, Rianxo converteuse no epicentro dun acto histórico: a homenaxe a Alfonso Daniel Rodríguez Castelao no 25º aniversario do seu pasamento. Este evento non só foi un pioneiro recoñecemento ao legado dun dos maiores símbolos da identidade galega, senón tamén unha demostración de resiliencia fronte aos obstáculos impostos polo réxime franquista. A través de documentación exhaustiva preservada, o Consello da Cultura Galega (CCG) dá a coñecer o complexo proceso de organización que implicou colaboración transatlántica, negociacións con autoridades e unha paixón compartida por honrar a memoria de Castelao. Con este especial o CCG abre o apartado específico no seu web no que concentrará materiais sobre o intelectual.
17/01/2025

Un decálogo propón regular a iluminación artificial

Reducir a contaminación luminosa, crear mecanismos de control nos organismos e servizos de ordenación urbana ou elaborar unha normativa que poña freo á instalación xeneralizada de pantallas publicitarias ultrabrillantes son algunhas das recomendacións que se inclúen no “Decálogo por un uso responsable da iluminación artificial” que elaborou unha comisión técnica do Consello da Cultura Galega (CCG). “O documento quere influír nas medidas para recuperar o ceo nocturno” explicou a presidenta do CCG, Rosario Álvarez que presentou este venres o documento xunto coa coordinadora da Sección de Ciencia, Tecnoloxía, Natureza e Sociedade, Elena Vázquez Cendón; o membro da comisión Salvador Bará e o científico e coordinador da comisión Jorge Mira. O documento, que xa se pode descargar desde o web da institución, está dirixido ás administracións públicas.
16/01/2025

Repertorio da prensa da emigración galega inclúe un número especial da sociedade venezolana Hijos de la Estrada

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de xaneiro un número especial da publicación da sociedade Centro Benéfico Social Hijos de La Estrada, creada en Caracas en 1959. Trátase dun número conmemorativo que permite coñecer a historia da sociedade e inclúe creacións de distintos xéneros entre as que destaca a partitura do pasodobre “Estrada-Caracas” composta para a ocasión polo entón director da Banda da Estrada, Eulogio López Masid.
15/01/2025

Comeza o “Foro participativo: un país coa súa lingua”

“Foro participativo: un país coa súa lingua” é o título do proceso que o Consello da cultura Galega (CCG) pon en marcha co obxectivo de ofrecer medidas concretas e prioritarias para avanzar na recuperación do vigor do galego. A presidenta do CCG, Rosario Álvarez; a vicepresidenta e coordinadora deste foro, Dolores Vilavedra; e o coordinador do Observatorio da Cultura Galega, Hakan Casares, explicaron esta iniciativa que aposta por un modelo áxil de seis mesas sectoriais, que busca resultados que poidan ser medibles a curto e medio prazo e que parte dos aspectos positivos do idioma que xa están a funcionar. O proceso rematará en novembro coa presentación do documento final. Ademais, presentouse un novo informe que completa a diagnose sobre a situación do galego. O estudo asegura que en Galicia se evidencia un patrón de perda interxeracional na competencia do idioma que é contrario ao que se observa no resto das comunidades autónomas con linguas cooficiais.
15/01/2025

Unha xornada explora a relación entre Castelao e Avelino Cachafeiro, que entra no Álbum de Galicia

Foi o mellor gaiteiro de Galicia, así o acreditaba un concurso que gañou en 1924 e do que Castelao daría conta nun artigo acompañado dun debuxo. Mais Avelino Cachafeiro Bugallo (Soutelo de Montes, Pontevedra, 1899 - 1972) foi tamén un creador versátil e empresario, que chegou a ter unha sala de festas e unha funeraria. A súa biografía xa se pode consultar no Álbum de Galicia, colección de biografías dixitais do Consello da Cultura Galega (CCG), nunha entrada asinada por Rubén Troitiño. Este docente e musicólogo é tamén un dos participantes na xornada “Redescubrindo a figura de Avelino Cachafeiro, o Gaiteiro de Soutelo” que se desenvolve este xoves e na que se aborda a relación da súa figura coa de Castelao.
14/01/2025

Doce vídeos divulgativos sobre o xenoma centran o primeiro Proxector do ano

“Investigación xenómica: descifrando a medicina do futuro” é o título do novo especial de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). Doce vídeos divulgativos para descubrir máis sobre o ADN e o xenoma ao fío da posta en marcha do Proxecto Xenoma Galicia, iniciativa pioneira en España que busca avanzar no coñecemento das enfermidades mediante a recollida de datos clínicos, datos xenéticos e mostras biolóxicas que serán a clave para o avance da medicina personalizada e para establecer estratexias de saúde en Galicia.
10/01/2025

A institución reforza o seu carácter asesor con dous foros participativos

O Consello da Cultura Galega (CCG) celebrou no serán deste xoves unha sesión plenaria ordinaria na que a súa presidenta, Rosario Álvarez, detallou as liñas de programación para 2025. Destaca a posta en marcha dun gran foro participativo que ofreza propostas perante os recentes datos sobre a situación da lingua, a celebración do Ano Castelao e o Día das Letras Galegas, así como o mantemento das liñas de acción habituais. A institución estatutaria realizou en 2024 un centenar de actividades, 18 publicacións e 55 documentos de asesoría entre estudos e informes de impacto ambiental e Bens de Interese Cultural (BIC). Ademais, aprobouse a incorporación da matemática Elena Vázquez Cendón (Ourense, 1966) á Comisión Executiva como secretaria. Ao plenario asistiu o Presidente de Honra da institución, o presidente da Xunta de Galicia, Alfonso Rueda Valenzuela.
07/01/2025

Un acto cívico abre os actos de homenaxe a Castelao no seu 75 cabodano

“Castelao convócanos sempre e únenos a todos” afirmou Miguelanxo Seixas no nome da institución que preside, a Fundación Castelao, máis tamén do Consello da Cultura Galega (CCG) e do Museo do Pobo Galego impulsores da ofrenda floral que abriu esta mañá a conmemoración do Ano Castelao. A presidenta do CCG, Rosario Álvarez; a presidenta do Padroado do Museo do Pobo, Concha Losada; o presidente da deputación da Coruña, Valentín González Formoso; o conselleiro de Cultura, José López Campos; a alcaldesa de Santiago, Goretti Sanmartín; e o presidente do Parlamento, Miguel Ángel Santalices, participaron neste acto cívico que lembrou a figura do narrador, ensaísta, dramaturgo, debuxante, médico e político galego, Alfonso Daniel Rodríguez Castelao, cando se cumpren 75 anos do seu pasamento en Bos Aires.
03/01/2025

Ceden ao Arquivo Sonoro de Galicia a Fonoteca Escolas Proval

A presidenta do Consello da Cultura Galega (CCG), Rosario Álvarez, e a directora do IES Escolas Proval, María Pilar Piay Pombo, asinaron este venres un acordo polo que este centro cede ao Arquivo Sonoro de Galicia, centro dependente do CCG, a Fonoteca Escolas Proval. “Agradecemos esta cesión que ten un gran valor filolóxico, histórico e musicolóxico” apuntou a presidenta do CCG. Pola súa banda, a directora do IES Escolas Proval, destacou que se trata “dun acto de homenaxe aos profesores María Xosé González Chamorro e Bieito Legaspi que promoveron desde as súas aulas este traballo de recollida oral“. O material cedido está composto de 320 rexistros realizados por preto de 500 escolares deste centro entre 1989 e 2004. O material deposítase no Arquivo Sonoro de Galicia para a súa custodia e posterior dixitalización.
20/12/2024

A celebración do 75 cabodano de Castelao será diversa e estenderase por toda Galicia

San Domingos de Bonaval acolle o vindeiro 7 de xaneiro un acto cívico que abre a celebración da conmemoración do 75 cabodano de Alfonso Daniel Rodríguez Castelao (Rianxo, 1886- Bos Aires, 1950). Diferentes representantes da comisión constituída o pasado 7 de novembro xuntáronse no Consello da Cultura Galega (CCG) este venres para presentar as primeiras accións de programación encamiñadas a poñer a atención sobre a vixencia e o legado da súa figura. A presidenta do CCG, Rosario Álvarez; o presidente da Fundación Castelao, Miguel Anxo Seixas; o director xeral de Cultura, Anxo Lorenzo; o presidente da Real Academia Galega (RAG), Víctor Freixanes; a presidenta do padroado do Museo do Pobo Galego, Concha Losada; xunto con representantes doutras entidades avanzaron as liñas de programación da celebración. Ademais, fixeron un chamamento á cidadanía da participar na celebración dunha personalidade irrepetible de tan alta transcendencia na historia contemporánea de Galicia.