NOTICIA

Rexistros 2431 a 2442 de 2442
27/05/2004

O XACOBEO COMO UN PRODUTO DE COMUNICACIÓN CON ÉXITO, A DEBATE NO CONSELLO DA CULTURA GALEGA

O Consello da Cultura Galega (CCG) reúne este xoves e venres, días 27 e 28 de maio, a expertos de universidades, medios de comunicación e institucións nun amplo debate en torno ao Xacobeo nas xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O encontro, dirixido polo coordinador da Sección de Comunicación do CCG, Xosé López, e a secretaria xeral do Grupo Español de Comunicación da UNESCO, Ángeles Pérez, comezou esta mañá salientando o papel do Camiño de Santiago como vehículo de comunicación entre pobos e como fenómeno comunicativo exitoso.
26/05/2004

O XACOBEO, TEMA DE DEBATE ENTRE MEDIOS DE COMUNICACIÓN E INSTITUCIÓNS NO CONSELLO DA CULTURA

O Consello da Cultura Galega (CCG) acollerá este xoves e venres, días 27 e 28 de maio, as xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O encontro, dirixido polo coordinador da Sección de Comunicación do CCG, Xosé López, e a secretaria xeral do Grupo Español de Comunicación da UNESCO, Ángeles Pérez, analizará a difusión do Ano Xacobeo desde diversas instancias: as universidades, as institucións públicas e eclesiásticas e os medios de comunicación públicos e privados.
24/05/2004

O CONSELLO DA CULTURA GALEGA ACOLLE MAÑÁ UNHA CONFERENCIA DA ESCRITORA PORTUGUESA INÊS PEDROSA

O Consello da Cultura Galega (CCG) acollerá mañá martes, día 25, ás 19´00 horas, unha conferencia da escritora portuguesa Inês Pedrosa, quen reflexionará sobre ESCRIBIR FICCIÓN. A conferenciante será presentada polo escritor e profesor Carlos Quiroga.
18/05/2004

O CCG ACOLLE HOXE A PRESENTACIÓN DAS XORNADAS “O CAMIÑO DE SANTIAGO, DIVERSIDADE CULTURAL E COMUNICACIÓN”

O Consello da Cultura Galega acollerá este martes, día 18, a presentación das xornadas "O CAMIÑO DE SANTIAGO, DIVERSIDADE CULTURAL E COMUNICACIÓN", que se desenvolverán o 28 e 29 de maio na sede da institución en Santiago de Compostela.
18/05/2004

O CONSELLO DA CULTURA ACOLLERÁ UNHAS XORNADAS SOBRE "O CAMIÑO DE SANTIAGO, DIVERSIDADE CULTURAL E COMUNICACIÓN"

O Consello da Cultura Galega (CCG) acollerá os días 27 e 28 de maio as xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O obxectivo, según explicou o coordinador da Sección de Comunicación do CCG, Xosé López, é "abrir unha liña de traballo e reflexión sobre a difusión de todo o relacionado coa Ruta Xacobea e avanzar na creación dun espazo galego de comunicación. Para elo, compaxinaremos as exposicións teóricas coas experiencias e os puntos de vista dos profesionais dos medios de comunicación".
14/05/2004

RESPONSÁBEIS DE CASAS-MUSEO REIVINDICAN O VALOR DAS RUTAS LITERARIAS PARA COÑECER A HISTORIA

As rutas literarias en Galicia e Portugal centran hoxe a segunda sesión das "III Xornadas sobre Casas-Museo. O Patrimonio Inmaterial" que celebra estes días o Consello da Cultura Galega (CCG) en Santiago de Compostela. O coordinador do encontro e secretario da Fundación Rosalía de Castro, Gonzalo Rey Lama, destacou o "valor inigualable" que supoñen as rutas literarias, os percorridos creados para os visitantes en base ao camiño que un escritor ou os seus personaxes realizaron., para coñecer a historia, as obras e o contorno.
13/05/2004

O PROXECTO DA CASA-MUSEO DE CURROS ENRÍQUEZ EN CELANOVA ABRE DOUS DÍAS DE DEBATE SOBRE ESTES CENTROS

As "III Xornadas sobre as Casas-Museo. O Patrimonio Inmaterial" comezaron esta mañá no Consello da Cultura Galega (CCG) abordando a creación da Casa-Museo de Curros Enríquez en Celanova de man dun dos seus principais promotores, o académico Xosé Luis Méndez Ferrín. O escritor galego, ademais de explicar con entusiasmo este proxecto, destacou a necesidade de que a poboación sexa consciente "do tesouro" que supoñen as casas-museo de escritores como elemento de identificación e coñecemento das comunidades.
13/05/2004

O CONSELLO DA CULTURA PRESENTA MAÑÁ TRES PUBLICACIÓNS CONMEMORATIVAS DO DÍA DAS LETRAS GALEGAS

O Consello da Cultura Galega (CCG) presentará mañá venres, día 14, ás 11´00 horas no Instituto Rosalía de Castro de Santiago de Compostela, tres publicacións dedicadas á figura de Xaquín Lorenzo Fernández "Xocas", mestre da etnografía galega e a quen este ano se lle dedica o Día das Letras Galegas.
11/05/2004

AS III XORNADAS SOBRE AS CASAS-MUSEO AFONDARÁN NO CARÁCTER DE FOCO CULTURAL DESTAS INSTITUCIÓNS

O Consello da Cultura Galega (CCG) acollerá este xoves e venres, no salón de actos da institución, as III XORNADAS SOBRE AS CASAS-MUSEO. O PATRIMONIO INMATERIAL. O obxectivo destas xornadas é, segundo o seu coordinador, Gonzalo Rey Lama, "evidenciar e analizar o carácter de foco cultural que teñen as casas-museo", institucións emprazadas en casas onde viviron personaxes destacados e que xestionan o seu legado.
10/05/2004

O CONSELLO DA CULTURA PRESENTA MAÑÁ MARTES AS III XORNADAS SOBRE "AS CASAS-MUSEO. O PATRIMONIO INMATERIAL"

O Consello da Cultura Galega (CCG) acollerá mañá martes, día 11 de maio, ás 12:30 horas, a rolda de prensa de presentación das III XORNADAS SOBRE AS CASAS-MUSEO. O PATRIMONIO INMATERIAL. No acto intervirá Gonzalo Rey Lama, coordinador das xornadas e membro da Sección de Arquitectura do CCG.
05/05/2004

A REALIDADE GALEGA, NUN SORRISO

"Dar a coñecer a realidade galega e promover o diálogo con outras culturas, facendo da diferenza un valor e non unha limitación". Así explica Ramón Villares, coordinador da Sección de Cultura Galega no Exterior do CCG, o obxectivo da exposición "O sorriso de Daniel". Esta mostra representará a cultura galega no Fórum Universal das Culturas de Barcelona, un encontro patrocinado pola Unesco que pretende avanzar no respecto á diversidade cultural, ao desenvolvemento sostíbel e á paz.
05/05/2004

A TERTULIA LITERARIA DO CONSELLO DA CULTURA DEBATIRÁ SOBRE O SIGNIFICADO DO DÍA DAS LETRAS GALEGAS

Este xoves, día 6 de maio, a Sección de Literatura e Industrias da Edición do Consello da Cultura Galega (CCG) celebrará a súa tertulia mensual. O tema escollido nesta ocasión é "O significado do Día das Letras Galegas", que se celebrará o próximo 17 de maio. Os convidados serán Carlos Negro, escritor e secretario da Asociación de Escritores en Lingua Galega, Xosé Antón Pedreira, libreiro e presidente da Agrupación de Libreiros de Santiago, e Pilar Sampedro, presidenta da Asociación Galega do Libro Infantil e Xuvenil (GALIX), mestra e asesora de formación. O escritor, editor e membro da Sección de Literatura do CCG Miguel Anxo Fernán-Vello será o encargado de moderar o debate.
23/04/2004

O CONGRESO GALICIA-IRLANDA ANALIZA O "MILAGRE" ECONÓMICO IRLANDÉS E A DIÁSPORA DOS DOUS POBOS

Galicia e Irlanda como países de emigración e de industrialización tardía e as súas relacións culturais centraron a segunda xornada do Congreso internacional "Galicia-Irlanda: dúas Fisterras Europeas", que se celebra desde o mércores, día 21, no Consello da Cultura Galega (CCG). Entre a análise de similitudes e diverxencias, o profesor Fernando González Laxe foi o encargado de tocar un tema no que as relacións entre Irlanda e Galicia están na actualidade enfrontadas: a pesca. Laxe reclamou a igualdade de acceso aos caladoiros e control das cotas fronte aos irlandeses e a non imposicións de restriccións, sinalando que se a Unión Europea non resposta á necesidade de acordos, haberá que apostar por acordos privados ou das institucións galegas para conseguir que a flota desenvolva a súa capacidade. "Galicia non pode estar maniatada por postulados arcaicos", sinala, dada a importancia económica e social da pesca en Galicia.
22/04/2004

O CELTISMO E O "ANTICELTISMO" CENTRAN OS PRIMEIROS DEBATES DO CONGRESO GALICIA-IRLANDA

Tras a sesión inaugural de onte pola tarde, o "Congreso Galicia-Irlanda: dúas Fisterras Europeas" iniciou esta mañá a súa andadura no Consello da Cultura Galega (CCG) cunha análise das relacións históricas desde a antigüidade entre os dous territorios, que acabou cun animado debate sobre o celtismo e o "anticeltismo" actual. Deste xeito, abriuse un congreso internacional, organizado pola Sección de Cultura Galega no Exterior do CCG, as universidades de Santiago de Compostela e Cork (Irlanda) e o Comité de Relacións Culturais do Departamento de Artes, Deporte e Turismo de Irlanda, que até o día 24 analizará desde as relacións históricas enraizadas na lenda até a economía e a emigración dos dous países.
21/04/2004

A INAUGURACIÓN ESTA TARDE DO CONGRESO GALICIA-IRLANDA ABRE TRES DÍAS DE DEBATE SOBRE OS DOUS PAÍSES

Esta tarde, ás 18:00, terá lugar o acto de inauguración do "Congreso Galicia-Irlanda: dúas Fisterras Europeas" no Consello da Cultura Galega (CCG). Este evento internacional reunirá até o día 24 a expertos galegos e irlandeses para abordar nun amplo debate as similitudes e diverxencias dos dous territorios, desde as relacións históricas enraizadas na lenda sobre o tronco común céltico até a economía e a emigración. O congreso está organizado pola Sección de Cultura Galega no Exterior do CCG, as universidades de Santiago de Compostela e Cork (Irlanda) e o Comité de Relacións Culturais do Departamento de Artes, Deporte e Turismo de Irlanda.
20/04/2004

A HISTORIA PARELLA E OS CONTRASTES DE GALICIA E IRLANDA, A ANÁLISE DESDE MAÑÁ NO CONSELLO DA CULTURA

Mañá mércores, día 21, ás 18:00 terá lugar o acto de inauguración do "Congreso Galicia-Irlanda: dúas Fisterras Europeas" no Consello da Cultura Galega (CCG). Este evento internacional reunirá até o día 24 a expertos galegos e irlandeses para abordar nun amplo debate as similitudes e diverxencias dos dous territorios, desde as relacións históricas enraizadas na lenda sobre o tronco común céltico até a economía e a emigración. O congreso está organizado pola Sección de Cultura Galega no Exterior do CCG, as universidades de Santiago de Compostela e Cork (Irlanda) e o Comité de Relacións Culturais do Departamento de Artes, Deporte e Turismo de Irlanda.
19/04/2004

A EXECUTIVA DO CONSELLO DA CULTURA GALEGA CELEBRA MAÑÁ UNHA SESIÓN ORDINARIA NO CONCELLO DE FERROL

A Comisión Executiva do Consello da Cultura Galega (CCG) desprazarase mañá martes, día 20, a Ferrol para celebrar nesa cidade a súa reunión ordinaria semanal e estabelecer contactos co alcalde, Juan Juncal, e coa Corporación Municipal. Ás 11´00 horas está previsto o acto de recepción oficial no Concello, no que intervirán o alcalde da cidade e o presidente do CCG, Alfonso Zulueta de Haz.
14/04/2004

O ESCRITOR PORTUGUÉS JOÃO DE MELO FALARÁ DA SÚA OBRA ESTE XOVES NO CONSELLO DA CULTURA GALEGA

O escritor e agregado cultural da Embaixada de Portugal en España, João de Melo, reflexionará sobre a súa obra e a súa condición de escritor periférico este xoves, día 15, no Consello da Cultura Galega (CCG). Baixo o título "Portugal, país con illas", o autor portugués inaugura así un ciclo de conferencias, organizado pola Sección de Literatura e Industrias da Edición do CCG, que traerá á capital galega a relevantes escritores portugueses. O coordinador da Sección, Víctor F. Freixanes, será o encargado de presentar esta conferencia.
12/04/2004

O CONGRESO GALICIA-IRLANDA REUNIRÁ DESTACADOS EXPERTOS DOS DOUS TERRITORIOS PARA ANALIZAR AS SEMELLANZAS HISTÓRICAS E CULTURAIS

O Consello da Cultura Galega (CCG) acollerá entre o vindeiro 21 e 24 de abril o "Congreso Galicia-Irlanda: Dúas Fisterras Europeas". O presidente do CCG, Alfonso Zulueta de Haz, e o coordinador da Sección de Cultura Galega no Exterior da institución, Ramón Villares, presentaron esta mañá este encontro internacional, organizado polo CCG, as universidades de Santiago de Compostela e Cork e o Comité de Relacións Culturais do Departamento de Artes, Deporte e Turismo de Irlanda.
31/03/2004

"AS NOVAS NARRADORAS", TEMA DA TERTULIA MENSUAL DA SECCIÓN DE LITERATURA DO CONSELLO DA CULTURA

A Sección de Literatura e Industrias da Edición do Consello da Cultura Galega (CCG) celebrará mañá xoves, día 1 de abril, a partir das 17:00 horas, a súa tertulia literaria mensual. Previamente, ás 16:00 horas, e no mesmo lugar, haberá unha rolda de prensa coa intervención das escritoras invitadas e dos coordinadores do acto.
11/03/2004

O CONSELLO DA CULTURA GALEGA CONDENA E REPUDIA OS ATENTADOS PERPETRADOS EN MADRID

11/03/2004

SUSPENSIÓN DO ACTO DE PRESENTACIÓN DO LIBRO “ A HISTORIA DE GALICIA”, DE RAMÓN VILLARES

08/03/2004

O CONSELLO DA CULTURA GALEGA LEMBRA A CARLOS CASARES NO CABODANO DA SÚA MORTE

05/03/2004

O CONSELLO TENDE PONTES DE INTERCAMBIO CULTURAL COA MELLOR ARQUITECTURA VASCO-NAVARRA

O Consello da Cultura Galega (CCG) acolleu hoxe a segunda sesión das xornadas "A arquitectura vasco-navarra", que desde o xoves e até o sábado pretenden ofrecer unha visión global e pluridisciplinar da actual arquitectura destas comunidades de man de 18 dos seus máis relevantes arquitectos e investigadores. O obxectivo último, como sinala o presidente do CCG, Alfonso Zulueta de Haz, é estabelecer "pontes de coñecemento, cooperación e intercambio desde Galicia cara outros ámbitos culturais", para enriquecer a formación dos profesionais galegos e da arquitectura galega.
04/03/2004

EXPERTOS RECLAMAN NO CCG UNHA ARQUITECTURA DE SERVIZO FÓRA DA ESPECULACIÓN E SUPERFICIALIDADE

O Consello da Cultura Galega (CCG) acolle desde esta mañá e até o vindeiro sábado as xornadas "A arquitectura vasco-navarra", organizadas pola Sección de Arquitectura do CCG e nas que participan preto dunha vintena dos mellores profesionais desas comunidades. Na súa primeira sesión, o profesor Francisco José Mangado destacou que “nunca como agora se fala tanto e tan pouco da arquitectura”, criticando a superficialidade, especulación e reducionismo con que se aborda a arquitectura nalgúns ámbitos. Así, reclamou unha arquitectura "densa e seria", unha arquitectura de servizo que desbote a situación actual na que "o parecer importa máis que o ser".
03/03/2004

ALONSO MONTERO FALARÁ ESTE XOVES, NA TERTULIA LITERARIA DO CONSELLO, SOBRE A DENUNCIA DA SITUACIÓN DO GALEGO PERANTE A UNESCO EN 1954

A Sección de Literatura e Industrias da Edición do Consello da Cultura Galega (CCG) celebra este xoves, día 4, a súa tertulia literaria mensual. Nesta ocasión, será o escritor Xesús Alonso Montero o que aborde a súa última obra: "A batalla de Montevideo. Os agravios lingüísticos denunciados na UNESCO en 1954".
02/03/2004

PRETO DUNHA VINTENA DE EXPERTOS ANALIZARÁN NO CONSELLO DA CULTURA A ARQUITECTURA VASCO-NAVARRA

O presidente do Consello da Cultura Galega (CCG), Alfonso Zulueta de Haz, e o coordinador da Sección de Arquitectura do CCG, Iago Seara, presentaron esta mañá as xornadas “A arquitectura vasco-navarra”, que reunirán durante tres días a 18 dos máis relevantes profesionais da arquitectura neste territorio. As xornadas, que comezarán o xoves día 4 e acabarán o sábado día 6, pretenden ofrecer por primeira vez en Galicia unha visión global e pluridisciplinar da arquitectura actual do País Vasco e Navarra.
01/03/2004

O CONSELLO DA CULTURA GALEGA PRESENTA MAÑÁ EN ROLDA DE PRENSA AS XORNADAS “A ARQUITECTURA VASCO-NAVARRA”

As xornadas “A ARQUITECTURA VASCO-NAVARRA” serán presentadas en rolda de prensa mañá martes, día 2 de marzo, ás 12´30 horas, no salón de actos do Consello da Cultura Galega (CCG). As xornadas están organizadas pola Sección de Arquitectura do CCG e continúan a liña marcada polos encontros dedicados ás arquitecturas lisboeta e catalá, celebrados con anterioridade.
19/02/2004

A ESCRITORA BRASILEIRA NÉLIDA PIÑÓN FALARÁ O VENRES SOBRE “GALICIA NA MIÑA OBRA”, NO CONSELLO DA CULTURA GALEGA

O Consello da Cultura Galega (CCG) acollerá mañá venres, día 20, unha velada literaria, en forma de charla-coloquio, protagonizada pola escritora Nélida Piñón, quen reflexionará sobre o tema GALICIA NA MIÑA OBRA. No acto intervirán tamén os escritores Luís González Tosar, presidente do Pen Clube de Galicia, e Víctor F. Freixanes, director da Editorial Galaxia e coordinador da Sección de Literatura e Industrias da Edición do CCG. O coloquio, aberto ao público, celebrarase ás seis e media do serán no salón de actos do Consello da Cultura Galega (Pazo de Raxoi, segundo andar), en Santiago de Compostela.
03/02/2004

SUSO DE TORO INICIA ESTE XOVES AS "TERTULIAS DE LG3"