Noticias

Comisión de Acción Exterior (CCG). Rexistros1 a 30 de 42
04/11/2019

A exposición “Os Adeuses” inaugúrase hoxe en Florida no marco dun congreso sobre hispanistas

É a mostra que documenta os últimos momentos da emigración galega a América. “Os adeuses” narra a partida a través de 51 fotografías realizadas por Alberto Martí nos portos de Vigo e A Coruña entre 1957 e 1963. Despois de itinerar en numerosos destinos de España, Portugal e Brasil, chega agora ao Schmidt Center Gallery Public Space da Florida Atlantic University (FAU) onde estará ata o 13 de decembro. A inauguración terá lugar hoxe (5:30 PM, hora local) e estará presente a profesora da Hofstra University, Benita Sampedro Vizcaya.
22/10/2019

A delegación da Academia de Ciencias Sociais de China visita o Consello da Cultura Galega

A presidenta do Consello da Cultura Galega (CCG), Rosario Álvarez, recibiu esta mañá a visita da delegación da Academia de Ciencias Sociais de China. A comitiva estaba integrada polo actual vicepresidente da Academia e un dos estudosos máis importantes en materia de nacionalidades minoritarias en China; a voceira de Exteriores no Parlamento chinés e unha investigadora. Na reunión tamén estaba presente o membro do plenario do CCG e coordinador da Sección de Acción Exterior, Xulio Ríos.
02/10/2019

O Consello da Cultura Galega participa en Bélxica na xuntanza anual da Asociación Europea de Institucións Migratorias (AEMI)

A vixésimo novena xuntanza anual da Asociación Europea de Institucións Migratorias (AEMI), que reúne institucións relacionadas con temática migratoria, arrinca mañá no Red Star Line de Antwerpen (Bélxica). O Consello da Cultura Galega (CCG) participa nesta cita a través do Arquivo da Emigración Galega, cun relatorio no que abordará as singularidades da nosa emigración. A cita deste ano, que durará ata o sábado, está centrada en coñecer como se documenta a memoria dos movementos migratorios.
27/09/2019

A presidenta do Consello da Cultura Galega inaugura en Santos a exposición “Galicia Imaxinada”

“Galicia imaxinada” é unha mostra organizada polo Consello da Cultura Galega (CCG) que permite visualizar a influencia da emigración na creación da imaxe da Galicia a través da análise de varias publicacións. A presidenta do CCG, Rosario Álvarez, inaugurará mañá esta exposición na Sala de exposicións do Shopping Boqueirao. Con ela estará Eduardo Alves, presidente do Centro Español de Santos. A inauguración é unha das actividades previstas no marco dunha viaxe institucional encamiñada a reforzar as relacións institucionais e os lazos coa colectividade galega no Brasil.
21/09/2019

A presidenta do Consello da Cultura Galega reforza a acción exterior cunha viaxe a Brasil

Reforzar as relacións institucionais e os lazos coa colectividade son as dúas liñas de traballo que marcan a viaxe que a presidenta do Consello da Cultura Galega (CCG), Rosario Álvarez, inicia mañá a Brasil. A axenda da presidenta inclúe reunións destacadas como as que manterá co Presidente da Assemblea Legislativa da Bahía ou co director do Instituto Cervantes de Sao Paulo, xunto con numerosas xuntanzas cos colectivos de emigrantes das cidades de Salvador, Santos e Sao Paulo. Ademais, o sábado 28 terá lugar a inauguración na cidade de Santos da exposición “Galicia Imaxinada”, que recolle a influencia da emigración na configuración da identidade galega.
24/06/2019

A presidenta do Consello da Cultura Galega recibíu á secretaria xeral de Acción Exterior do goberno vasco

A presidenta do Consello da Cultura Galega (CCG), Rosario Álvarez, recibiu a semana pasada a María ángeles Elorza, secretaria xeral de acción exterior do goberno vasco. Canda ela viña tamén o director para a Comunidade Vasca no Exterior, Gorka Álvarez, que estivo no CCG o pasado mes de marzo. Na visita intercambiaron impresións sobre a preservación e as relación coas comunidades galegas e a conservación do seu patrimonio documental, así como iniciativas paralelas que se están a desenvolver en Euskadi e Galicia, como o “Museo da Emigración Galega” ou o “Museo da Emigración e do Exilio”.
20/06/2019

O “Foro Inés de Castro” abre unha nova xeira nas relacións entre a cultura galega e portuguesa

A presidenta do Consello da Cultura Galega (CCG), Rosario Álvarez, e o presidente do Camões Instituto da Cooperação e da Língua I.P. (CICL), Luís Faro Ramos, presentaron esta mañá novas liñas de acción da relación entre Galicia e Portugal. A primeira desas estratexias concrétase no “Foro Inés de Castro”, que toma o nome da nobre galega que reinou en Portugal despois de morrer, e programará unha serie de seminarios, xornadas e conferencias arredor de temáticas conxuntas. A primeira sesión deste foro terá lugar esta tarde cunha palestra de Luís Faro titulada “Perceções da Língua Portuguesa na Literatura”, á que asisten representantes do sector cultural. No marco desta viaxe, a presidenta do Consello da Cultura Galega xestionou reunións cos responsables da Real Academia Galega e, na xornada do venres, cos titulares das Consellerías de Cultura e Educación.
18/06/2019

Primeiro encontro de Institutos Culturais no Institut Ramon Llull

A sede do Institut Ramon Llull acolleu o luns 17 de xuño a primeira reunión entre os directores dos Institutos Culturais do Estado. O encontro serviu para poñer en común as diferentes liñas estratéxicas das organizacións, os seus retos e obxectivos.
04/06/2019

A presidenta do Consello da Cultura inaugura en Río de Xaneiro a exposición Galicia imaxinada

A presidenta do Consello da Cultura Galega, Rosario Álvarez, inaugura esta tarde no Instituto Cervantes de Río de Xaneiro a exposición "Galicia imaxinada nas revistas da emigración". Unha mostra que permite visualizar a influencia da emigración na creación da imaxe da Galicia no século XIX a través da análise de varias publicacións. A cita insírese dentro dunha serie de reunións que a presidenta desenvolve no marco dunha viaxe institucional a Brasil.
17/04/2019

O Consello da Cultura Galega exhibe en As benvidas a chegada agridoce dos emigrantes a Nova York

As benvidas é unha exposición que documenta e celebra as amargas alegrías das chegadas e nos axuda a ver outra cara da historia, un novo comezar” afirmou María Xosé Porteiro, membro da Comisión Executiva do Consello da Cultura Galega (CCG), no marco da inauguración que tivo lugar onte á tarde na sede de La Nacional, en Nova York. Canda ela estaba o cónsul para asuntos culturais, Juan José Herrera; o presidente de La Nacional, Antonio Morales, xunto cos comisarios da mostra, James D. Fernández e Luis Argeo. A exposición serve de contrapunto doutra mostra que o CCG levou ao Museo da Migración de Ellis Island, “Os adeuses”, na que se que retrataban as despedidas dos emigrantes galegos.
15/04/2019

O Consello da Cultura Galega inaugura mañá en Nova York a exposición “As benvidas”

“As benvidas” é o título da nova exposición que o Consello da Cultura Galega (CCG) inaugura mañá na sociedade neoiorquina “La Nacional. The Spanish benevolent”. A cita contará coa presenza de María Xosé Porteiro, membro da Comisión Executiva do CCG; o cónsul para asuntos culturais, Juan José Herrera, e os comisarios da mostra, James D. Fernández e Luis Argeo. A exposición documenta a amarga alegría das chegadas a través dos arquivos familiares dos descendentes dos emigrantes españoles en EE. UU. Serve de contrapunto da exposición “Os adeuses”, que o CCG inaugurou en febreiro e que acaba de ser incluída na programación da Semana do Patrimonio Inmigrante que organiza o goberno da cidade de Nova York.
28/03/2019

A presidenta do Consello da Cultura Galega inaugurou en Salvador de Bahía a mostra “Galicia Imaxinada”

É unha mostra que recolle a Galicia dos emigrantes: a real e a imaxinada. Chámase “Galicia Imaxinada” e visualiza a influencia da emigración na creación da imaxe da Galicia no século XIX e faino a través de revistas porteñas e habaneiras”. A exposición foi inaugurada no serán do mércores pola presidenta do Consello da Cultura Galega, Rosario Álvarez, xunto con Lidia María Batista Branado, superintendente do Sistema de Bibliotecas da UFBA; Alvanita Almeida Santos, vicedirectora do Instituto das letras da UFBA, e Mailson Lopes, coordinador do Centro de Estudos da Língua e Cultura Galegas da UFBA. A mostra estará aberta ata o 29 de abril e inicia a súa itinerancia por Brasil.
20/07/2016

O Consello da Cultura presenta en Ponta Delgada un libro sobre emigración e exilio en Galicia e Azores

O presidente do Consello da Cultura Galega (CCG), Ramón Villares, presenta mañá en Ponta Delgada (Illa de São Miguel, Azores) a publicación Emigración e exilio nos Estados Unidos de América: experiencias de Galicia e Azores. A actividade, organizada coa Fundação Luso-Americana para o Desenvolvimento (FLAD), enmárcase dentro dos actos conmemorativos do corenta aniversario da autonomía da asemblea lexislativa das illas dos Azores. No acto tamén estarán presentes dous coordinadores da publicación, Alberto Pena e Mário Mesquita, así como Michael Baum, administrador da FLAD.
12/04/2016

O Consello da Cultura Galega leva a Braga a exposición que recolle a dimensión internacional de Valle-Inclán

“Outros verbos, novas lecturas: Valle-Inclán traducido”(1930-1936) é o título da exposición que pretende dar conta da dimensión internacional deste escritor a través das traducións das súas obras a outras linguas. A versión en portugués desta mostra inaugurouse na tarde deste martes no Museo Nogueira da Silva en Braga. Alí estivo presente o presidente do Consello da Cultura Galega, Ramón Villares, e a comisaria, Rosario Mascato, nun acto que contou coa actuación musical do grupo Zoar.
16/12/2015

Belo Horizonte acolle Os Adeuses, a mostra que documenta o último éxodo galego a América

Os Adeuses é a exposición que amosa, a través da ollada do fotógrafo Alberto Martí, os últimos momentos da emigración galega cara a América dos anos cincuenta do século pasado que tivo en Brasil e Uruguai os principais destinos. A mostra chega agora a Belo Horizonte (Brasil), onde se pode ver ata o día 27 de febreiro de 2016. Estará aberta no O CâmeraSete–Casa da Fotografia de Minas Gerais, un espazo dedicado ás artes visuais da Fundação Clóvis Salgado, resultado dunha colaboración entre a Secretaria de Estado de Cultura de Minas Gerais e o Instituto Moreira Salles.
27/10/2015

O Consello da Cultura celebra en Vilanova de Arousa o nacemento de Valle-Inclán cunha mostra que recolle a repercusión internacional

Este mércores cúmprense 149 anos do nacemento de Ramón María del Valle-Inclán (1866-1936). Unha efeméride que o Consello da Cultura Galega celebra coa inauguración da exposición “Outros verbos, novas lecturas: Valle-Inclán traducido [1930-1936]”, que pretende dar conta da dimensión internacional deste escritor a través das traducións das súas obras a outras linguas. Será en Vilanova de Arousa, na súa Casa-Museo, onde estará o presidente do Consello da Cultura Galega, Ramón Villares, e a comisaria desta mostra, Rosario Mascato.
24/09/2015

O Consello da Cultura leva a literatura galega á feira do libro de Göteburgo

A cultura galega estará presente na Feira do libro de Göteburgo, que se desenvolve ata o domingo nesa cidade sueca. Faino a través do Consello da Cultura Galega, que conta cun espazo compartido con outras linguas peninsulares e coa participación nun programa cultural ao que asisten Dolores Vilavedra e Inma López Silva. Este encontro é o maior festival literario dos países escandinavos e está considerado como a segunda feira europea en relevancia, despois da de Frankfurt.
24/09/2015

O concepto migracións centrou o primeiro encontro Mateus DOC celebrado en Galicia

Mateus DOC é un exitoso programa que busca estimular o diálogo interdisciplinar entre investigadores novos que reflexionan arredor dun tema. Esta cita, organizada polo portugués Instituto Internacional Casa Mateus (IICM), tivo lugar esta fin de semana en Santiago. É a primeira vez que se realiza fóra de Portugal e foi posible grazas á colaboración do Consello da Cultura Galega. Esta edición pretendeu servir de reflexión sobre o concepto de Migración.
23/09/2015

O Consello da Cultura Galega participa na xuntanza anual da Asociación Europea de Institucións Migratorias (AEMI) en Turín

“Europa e as migracións no terceiro milenio” é o título da xuntanza anual da Asociación Europa de Institucións Migratoria (AEMI) que se desenvolve ata o sábado en Turín, Italia. Nesta cita estará presente o Consello da Cultura Galega, a través do seu Arquivo da Emigración Galega, cun relatorio que ofrecerá unha visión das novas mobilidades de migración en Galicia.
14/09/2015

O Consello da Cultura Galega leva a Roma a exposición que recolle a dimensión internacional de Valle-Inclán

“Altre parole, nuove letture: Valle-Inclán tradotto [1906-1936]” (“Outros verbos, novas lecturas: Valle-Inclán traducido”) é o título da exposición que pretende dar conta da dimensión internacional deste escritor a través das traducións das súas obras a outras linguas. A versión en italiano da mostra inaugúrase este martes 15 de setembro na Academia de España en Roma coa presenza do presidente do Consello da Cultura Galega, Ramón Villares, e a súa comisaria, Rosario Mascato. A mostra ten especial significación xa que foi o último destino profesional de Valle-Inclán antes da súa morte.
12/04/2015

A vicepresidenta do Consello da Cultura Galega participa no I Encontro Brasileiro de Estudos Galegos

Mañá comeza na Universidade Federal da Bahia (UFBA) o I Encontro Brasileiro de Estudos Galegos (I EBEG), unha cita que ten tres obxectivos: conmemorar o aniversario do Centro de Estudos da Lingua e Cultura Galegas (CELGA), homenaxear a fundadora do Centro de Estudos Galegos na Bahia, a profesora Rosario Suárez Albán, así como intensificar o diálogo intelectual entre investigadores brasileiros e estranxeiros que se dediquen aos estudos galegos. Nesta cita, que se estende ata o mércores 15, estará presente Rosario Álvarez, vicepresidenta do Consello da Cultura Galega.
05/04/2015

O Consello da Cultura participa no XI congreso da Asociación de Estudos Galegos que comeza mañá en Arxentina

Mañá arrinca en Bos Aires a undécima edición do congreso anual da Asociación Internacional de Estudos Galegos (AIEG). Nesta ocasión céntrase en analizar como a globalización muda as identidades nas fronteiras, na emigración e no exilio. O Consello da Cultura Galega (CCG) contribúe coa organización de dous ciclos de diálogos: un sobre o papel de Bos Aires como capital cultural galega e outro sobre o asociacionismo étnico e a identidade.
12/03/2015

O presidente do Consello da Cultura conclúe mañá a súa viaxe a Brasil cunha conferencia no Instituto Cervantes de São Paulo

Ramón Villares, presidente do Consello da Cultura Galega, remata mañá unha viaxe a Brasil co obxectivo de contribuír a difundir a cultura galega no exterior. Hoxe participa no acto de nomeamento da escritora de orixe galega Nélida Piñón como directora da Cátedra José Bonifácio do Centro-Iberoamericano (CIBA-USP). A última cita da axenda prevista terá lugar mañá cunha conferencia sobre o patrimonio galego da emigración na sede do Instituto Cervantes de São Paulo.
08/03/2015

O presidente do Consello da Cultura inicia unha viaxe a Brasil no marco da súa liña de acción exterior

Ramón Villares, presidente do Consello da Cultura Galega, inicia unha viaxe a Brasil co obxectivo de contribuír a difundir a cultura galega no exterior. A súa axenda comeza hoxe luns coa inauguración de Os adeuses, a exposición que amosa os últimos momentos da emigración galega cara a América dos anos cincuenta do século pasado. Na inauguración estará presente o director do Instituto Cervantes de Río de Xaneiro, Oscar Pujol; o presidente da Casa de España, Alexandre Bouzón; e Pablo Figueroa Dorrego, conselleiro de Emprego e Seguridade Social da Embaixada de España en Brasil. Contará tamén coa presenza da escritora e académica Nélida Piñón, de orixes galegas e autora do gran romance sobre a emigración galega no Brasil, A república dos sonhos.
18/12/2014

Os responsables dos institutos Etxepare e Llull explican as estratexias de difusión da lingua vasca e catalá

O estudo das linguas e das culturas vasca e catalá centraron a segunda sesión do seminario internacional Estudos galegos/Estudos ibéricos. Alén das fronteiras, que se desenvolve ata mañá na sede do Consello da Cultura Galega. Unha cita coordinada por Henrique Monteagudo encamiñada a coñecer e mellorar as estratexias de difusión e promoción das distintas linguas ibéricas. Os responsables dos institutos Etxepare e Llull explicaron a situación actual da internacionalización do vasco e catalán, respectivamente, a través dos diferentes programas que desenvolven, así como as súas propostas de futuro.
17/12/2014

O papel do Instituto Cervantes na difusión das culturas peninsulares abre o seminario Estudos Galegos/Estudos Ibéricos

“Un dos grandes retos do Instituto Cervantes pasa por mellorar as súas relacións coas linguas de España”. Con estas palabras Víctor García de la Concha, responsable do Instituto Cervantes abriu a quenda de relatorios do seminario internacional Estudos galegos/estudos ibéricos. Alén das fronteiras que se desenvolve ata o venres no Consello da Cultura Galega. A inauguración desta cita correu cargo do Presidente da institución, Ramón Villares, quen destacou a importancia do debate acádemico e institucional de poñer sobre a mesa a difusión da lingua e da cultura galega nun momento actual. Canda el, o coordinador do seminario, Henrique Monteagudo, incidiu na inseparabilidade dos estudos galego no marco dos hispánicos pero tamén luso-brasileiros.
16/12/2014

O Consello da Cultura aborda nun seminario a difusión e promoción das linguas ibéricas

A universidades de Kiev (Alemaña), Zadar (Croacia), Cork (Irlanda), Nova York (Estados Unidos), Bos Aires (Arxentina)… son algunhas das trinta e sete de todo o mundo nas que se estuda a lingua e a cultura de Galicia. Este tipo de prácticas comezaron hai unhas tres décadas e agora cómpre revisar cales son os atractivos e o interese que estes estudos teñen no contexto actual. Este é un dos cometidos do seminario internacional “Estudos Galegos/Estudos Ibéricos. Alén das fronteiras”, que se desenvolve ata o venres 19 na sede do Consello da Cultura Galega. A cita tamén serve para por sobre a mesa as modalidades de promoción, difusión e articulación das linguas ibéricas (galego, portugués, catalán e vasco) nos ámbitos académicos internacionais. O presidente da institución, Ramón Villares, e o coordinador do seminario, Henrique Monteagudo, son os encargados da inauguración que terá lugar mañá mércores ás 16:30 horas.
12/12/2014

O Consello da Cultura, a Xunta e o Parlamento presentan as Memorias de Rosendo Salvado en galego

Ramón Villares, presidente do Consello da Cultura Galega, Alberto Núñez Feijoo, presidente da Xunta de Galicia e Pilar Rojo, presidenta do Parlamento de Galicia presentaron esta mañá no Parlamento a publicación Memorias históricas sobre a Australia de Rosendo Salvado. “Non son o balance vital ou o testamento, senón máis ben o proxecto de toda unha vida” explicou Ramón Villares sobre o libro que ve agora a luz tras das súas edicións en italiano, francés, español e inglés. A publicación, que xa se pode descargar desde o web do CCG, documenta a traxectoria de Rosendo Salvado en Australia, onde desenvolveu un asentamento misioneiro desde un revolucionario punto de vista en época colonial, baseado na defensa dos dereitos dos aborixes.
11/12/2014

Mañá se presenta no Parlamento a edición en galego as Memorias sobre a Australia de Rosendo Salvado

O vindeiro venres 12 de decembro, Ramón Villares, presidente do Consello da Cultura Galega, Alberto Núñez Feijoo, presidente da Xunta de Galicia e Pilar Rojo, presidenta do Parlamento de Galicia, presentarán (11:00 horas) no Parlamento a publicación Memorias históricas sobre a Australia. Trátase da edición en galego da publicación homónima escrita por Rosendo Salvado, na que recolle as súas vivencias en Australia, onde desenvolveu un asentamento misioneiro desde un revolucionario punto de vista en época colonial, baseado na educación e na defensa dos dereitos das comunidades aborixes.
10/12/2014

Un seminario do Consello da Cultura reflexiona sobre o interese do galego no ámbito internacional

Coñecer cales son os atractivos e interese que pode ter o galego no panorama académico de fóra de Galicia. Este é o principal obxectivo do seminario internacional “Estudos Galegos/Estudos Ibéricos. Alén das fronteiras”, que se desenvolverá na sede do Consello da Cultura Galega entre os días 17 e 19 de decembro. A cita ten outro valor engadido, que é o de xuntar por primeira vez na mesma mesa os responsables dos institutos encargados da difusión da cultura e o idioma das diferentes linguas ibéricas, como son o Instituto Cervantes, Camões, Llull e Etxepare. O seminario conta con trinta prazas, nas que terán preferencia as persoas relacionadas coa proxección internacional da lingua e da cultura galegas.