Os primeiros resultados deste documento, central para coñecer a situación da cultura galega, sitúan na cuarta posición o filme As bestas, citado polo 5,6% das persoas entrevistadas (o estudo fíxose antes da celebración da gala dos Goya) e cuxa repercusión se deixa sentir tamén noutras categorías, como a mención a Luis Zahera (1,6%) e a algúns dos profesionais que conforman a categoría colectiva de “outros actores e actrices destacados” (1,1%). O avance do Barómetro da Cultura Galega tamén salienta o bo momento do sector audiovisual. Defíneo dun xeito xenérico como a “visibilidade do audiovisual galego”, que, co 5,4%, figura no sexto lugar da táboa, seguido da mención a outros actores, como Luís Tosar (1%) ou Carlos Blanco (0,3%); aos filmes O que arde (0,7%) e O corpo aberto (0,6%), ou á curtametraxe Esliva (0,4%). Nese mesmo posto compiten series como Rapa (0,4%) e outros eventos do sector, como os Premios Mestre Mateo (2,2%), Cineuropa (0,9%) ou o Festival de Cans (0,7%).

A música ocupa tamén un lugar destacado nos eventos e accións culturais máis relevantes do ano pasado. Os festivais suman un 5,5%, porcentaxe na que non se inclúen citas concretas como o Resurrection Fest (2%), o Festival Sinsal (1%), o Festival da Luz (0,8%) e o Festival Internacional do Mundo Celta de Ortigueira (0,8%). En relación coa música, ademais do fenómeno das Tanxugueiras, tamén se mencionan especificamente outros artistas como Sés (1%), Baiuca (0,6%), Xabier Díaz (0,4%) ou Carlos Núñez (0,4%) e institucións musicais como a Orquestra Sinfónica de Galicia (1,3%) e a Real Filharmonía de Galicia (0,9%).

No sector teatral o avance do Barómetro destaca o grupo Chévere, coa súa obra N.E.V.E.R.M.O.R.E. (1,7%), e no literario a Marilar Aleixandre, Premio Nacional de Narrativa (1,6%). Tamén salienta o descenso de once puntos da opción “Non sabe/non contesta”, que acadara en 2021 un 36,6%.

Barómetro da Cultura Galega
En 2020 o Consello da Cultura Galega promoveu a elaboración do Barómetro da Cultura Galega, un conxunto de traballos de investigación cuxo obxectivo é describir o estado, a evolución, as necesidades e as perspectivas das entidades culturais galegas.