“Os ecosistemas montañosos teñen gran valor científico, ecolóxico, patrimonial e lingüístico por si mesmos, ao que temos que sumarlle as actividades que se desenvolven neles”, asegura o especial, que destaca o potencial que teñen, por exemplo, o deporte ou o turismo para “producir benestar económico e social para as comunidades rurais alí asentadas e para as persoas que se achegan a coñecelos e gozar deles”.
Os vídeos que se escolmaron para esta entrega de Proxector permiten coñecer a gran reserva de montes e montañas da nosa comunidade, identificar a pegada que os seus poboadores deixaron a través da toponimia ou a arqueoloxía e descubrir os tesouros naturais, xeolóxicos e patrimoniais que atesouran lugares como a devesa da Rogueira ou o monte Pindo. A construción do túnel de Montefurado, levada a cabo polos romanos hai case 2000 anos para desviar o curso do río Sil e buscar ouro entre os sedimentos, é outro dos materiais que recolle o especial. Ademais, tamén se recompilaron pezas nas que se explican algunhas das técnicas para xestionar de forma óptima as explotacións forestais ou que abordan o tema da propiedade comunal como motor do desenvolvemento rural. Así, no vídeo “O Rei Sol: Arqueoloxía sen escavar” achégase o exemplo das comunidades veciñais de montes en man común de Oia, que decidiron formular unha xestión alternativa do monte e promover o proxecto de arqueoloxía Costa dos Castros, pensado desde e para a comunidade. O recurso “Microtoponimia nas serras de interior”, centrado no valor toponímico dos penedos, leiras e camiños das montañas do interior de Galicia, completa os materiais aos que se pode acceder nesta nova entrega do especial.
O proxecto
Proxector: audiovisuais en galego para a docencia é un espazo web dedicado a recompilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario.
O proxecto orixinal foi deseñado polo Servizo de Normalización Lingüística da Universidade de Santiago de Compostela e botou a andar no ano 2015 no portal educativo Didactalia. En 2018 o CCG, a través do Centro de Documentación Sociolingüística de Galicia (CDSG), sumouse á iniciativa e comezou a participar de xeito activo tanto na súa coordinación como na edición de contidos. Cumprindo coas competencias que lle son propias no eido da preservación e difusión do idioma galego, o CCG acordou asumir tamén a custodia dos datos recompilados ao longo destes anos e que, a partir de agora, estarán ao dispor da cidadanía no sitio web institucional.
Os vídeos están clasificados segundo a súa temática, o idioma no que foron gravados ou subtitulados e o nivel de ensino no que se considera que poden ser empregados. A maiores, ofrécese unha ficha descritiva coa información básica de cada recurso. Pódese acceder aos contidos a través da busca libre ou dos diferentes despregables, que permiten filtrar os resultados segundo os criterios de clasificación antes citados.
