O Consello da Cultura Galega participa en varias actividades en Bos Aires

Bos Aires celebra estes días a 46ª edición da súa Feria Internacional do Libro. Unha cita destacada no panorama mundial na que participa o Consello da Cultura Galega (CCG), en virtude do convenio de colaboración asinado co Instituto Cervantes, co Institut Ramón Llul e o Etxepare Euskal Institutua. No marco do programa da feira, este venres 13 de maio terá lugar un encontro con autores que escriben nas linguas cooficiais do Estado. A cita estará moderada polo poeta e director do Instituto Cervantes, Luis García Montero, e nela participan, a escritora galega, Berta Dávila, premio Xerais 2021 e premio da Crítica de narrativa galega 2019; o antropólogo e narrador Adriá Pujol; xunto coa escritora Marta Sanz, premio Herralde de novela 2015 e finalista do Premio Nadal 2006. O encontro conta coa colaboración da Consejería Cultural da Embaixada de España na Arxentina.

No marco desta visita a Bos Aires, a escritora Berta Dávila coñeceu o Colexio Santiago Apóstol de Bos Aires. Alí participou nun encontro na sala Luís Seoane cos alumnos de 5º e 6º curso.

O Colexio Santiago Apóstol foi creado en 1989 por iniciativa da Xunta de Galicia e do Centro Galicia de Bos Aires. É unha institución educativa singular que naceu coa finalidade de acrecentar o proceso de conformación e conservación dunha identidade galego-arxentina por medio dunha educación bicultural.

O ideario do centro marca como obxectivo propagar e soster o ensino en calquera nivel, infundindo na aula o ideal de servizo e solidariedade e o coñecemento dos valores culturais do pobo galego, da súa lingua, das súas tradicións, historia, folclore, arte e demais manifestacións.