Deixou dito Vicente Risco que “todo depende das particulares apetencias de cada forasteiro. Pero hai algo en que todos os homes coinciden, que é no gozo dos sentidos; por eles chéganos dentro o mundo”. Coa intención de buscar novas formas de ofrecer o que é Galicia aos visitantes, esta xornada pretende conciliar o aspecto cultural co turístico.
A presidenta do Consello da Cultura Galega, Rosario Álvarez; a alcaldesa de Allariz, Cristina Cid, e a presidenta da Fundación Vicente Risco e membro da Sección de Pensamento do CCG, Celia Pereira Porto, son as encargadas de inaugurar esta cita. Despois, as responsables das dúas entidades organizadoras, o CCG e a FVR, ofrecerán os primeiros relatorios, que abordarán o papel das institucións como axentes de dinamización cultural.
No seguinte bloque falarase de centros museísticos. Nese sentido, Rafael Quintía, antropólogo e socio de Aborigine Antropoloxía Produción e Xestión Cultural, tratará de museos galegos e turismo sustentable. Deseguido haberá un diálogo entre Antonio Piñeiro, secretario da Fundación Curros Enríquez – Casa dos Poetas, Celanova; César LLana, director do Museo Etnolóxico de Ribadavia, e Juan Antonio Seara, responsable dos Museos de Allariz.
Xa pola tarde, Carlos Rodríguez Pérez, asesor de formación do profesorado no CAFI, e Manuel Gago, director do portal culturagalega.gal do Consello da Cultura Galega, falarán de percorridos culturais polo universo literario.
A cita conclúe cun bloque destinado a poñer de relevo tres iniciativas empresariais que xorden do turismo cultural. Un deles é “Compostela Campers”, unha axencia de viaxes polo noso país con caravanas e furgonetas camperizadas que explicará o seu director xeral, Elías Rozas Álvarez; outra é “Algueira. Enoturismo e máis na Ribeira Sacra”, que analizará un dos seus propietarios, Fabio González Pérez. A parte de experiencias remata co relatorio de Noemí Vázquez, a propietaria de Arca da Noe, unha atípica taberna cultural situada en Vilar de Santos, na comarca da Limia.