As condicións de iluminación solar do planeta mudan durante o ano. E este fenómeno fai que o punto do primeiro amencer ou do solpor tamén varíe. São Vicente e Cabo da Roca en Portugal, a Costa da Morte en Galicia e Aglapsvik e Måsøy en Noruega son os lugares nos que se produce este fenómeno. Esta especie de irmandade é o fío de unión dunha xornada que xunta especialistas de diferentes disciplinas para analizar as potencialidades turísticas destes espazos.
Profesionais do ámbito científico e turístico analizarán e debaterán durante un día asuntos como a creación de produtos turísticos, de marcas e de iniciativas do ámbito do turismo científico. Entre os participantes a esta cita destacan João Vasconcelos, da Escola Superior de Turismo e Tecnologia do Mar e do Instituto Politécnico de Leiria en Portugal; Maite Vence, directora de Observer Turismo Científico, ou o propio Jorge Mira Pérez, profesor da Facultade de Física da Universidade de Santiago de Compostela
Sección de Ciencia, Natureza, Tecnoloxía e Sociedade
A organización desta xornada insírese na liña de traballo da Sección de Ciencia, Natureza, Tecnoloxía e Sociedade, coordinada por Elena Vázquez Cendón. Entre as súas accións elaboran materiais e recursos didácticos como é o proxecto “Álbum da ciencia”, unha completa base de datos con biografías de científicos e científicas galegas, ou a publicación de varias bandas deseñadas. Nas súas actividades destacan informes como “A divulgación da ciencia en Galicia”, que compila a variedade e calidade de iniciativas que existen no noso país para a difusión do coñecemento científico. Ángel Carracedo, Jorge Mira, Xurxo Mariño ou Marilar Aleixandre son algúns dos membros desta sección.