Formas de violencia de xénero

Novos relatos da violencia machista

21 de novembro de 2024 Santiago de Compostela

---

As violencias machistas tamén se ven transformadas polos relatos que dan conta delas. Non queremos dicir con isto que mingüen, que diminúa o número de feminicidios nin de todas as outras formas de violencia que tan ben coñecemos. É, simplemente, que nestes tempos en que nada escapa á globalidade e ao dominio das redes, semellamos ser testemuñas en primeira persoa de exabruptos e discursos de odio que superan abondo o linde do distópico, que disparan ás cheas unha narrativa misóxina que tenta pór en dúbida todo canto levamos acadado.

A crise estrutural do sistema capitalista deixa furados moi profundos na economía social e as principais prexudicadas somos as mulleres, tanto coa falta de traballos, que obriga a emigrar as máis novas, como coa miseria de tantas pensións que vulnerabiliza as máis vellas. A isto aínda lle hai que sumar a pornografía, á que teñen acceso as e os máis novos; as guerras, que nos deixan como principais perdedoras; o auxe da ultradereita no mundo e, con el, o xurdimento sen pudor de movementos ultras que enarboran a misoxinia...

Certamente, non hai cambios dos bos, ou hainos nunha medida menor da desexada tras tantos anos de loita feminista, e así, nosoutras, como cada 25N, redobramos o esforzo por coller os puntos saídos da calceta, por comprender os procesos que se desenvolven para lles dar unha resposta axeitada, por acercar as persoas sabias e comprometidas que nos axuden no transo de achegar claridade ao noso dereito de sermos incluídas como cidadás en todos os ámbitos e de eliminar calquera tipo de violencia machista e mais as estruturas que as posibilitan. Agardámosvos para o debate nesta nova edición das xornadas sobre violencia que desde hai xa unha década levamos realizando no CCG.