Cristina Fallarás
Escritora e periodista coñecida pola súa defensa dos dereitos da muller e o seu activismo a favor da memoria histórica en España. Foi a primeira muller en gañar o Premio Hammett de novela negra con Las niñas perdidas.
O 26 de abril de 2018 lanzou o hashtag #Cuéntalo, onde millóns de mulleres relataron as agresións sexuais que sufriron e que supuxo un fenómeno internacional.
Traballou en numerosos medios de comunicación durante os seus máis de 30 anos de profesión, desenvolvendo actividades que abarcan desde reporteira e guionista ata directora. Neste momento exerce de analista política nas cadeas de televisión Telecinco, Cuatro, Telemadrid e TV3 e no diario Público. Imparte conferencias en universidades e institucións españolas e internacionais.
Autora das novelas: No acaba la noche (Planeta, 2006); Así murió el poeta Guadalupe (2009); Las niñas perdidas (2011); Últimos días en el Puesto del Este (2011); Honrarás a tu padre y a tu madre (2018); El evangelio según María Magdalena (2021); La Loca (2022). En non ficción publicou: Rupturas (2003); A la puta calle. Crónica de un desahucio (2013); Ahora contamos nosotras (2019), e en poesía: Posibilidad de un nido (2020).

David Rodríguez
Vigo, 1975.
Deseñador gráfico que traballa sobre todo no ámbito da edición.
Publicou teatro radiofónico: O Bambán (2007) e Nunca me esquecerei de ti (2010), poesía: Lapidarias, os versos escuros (2010), ensaio: O canastro sen tornarratos. Resistencia popular na era do capitalismo sen democracia. Unha ollada galega (2018) e literatura infantil e xuvenil: Superavoa (2020). En 2022 gañou a XXVI edición do Premio Vicente Risco de Ciencias Sociais co ensaio Liberdades antigas, tempos modernos: o republicanismo de Castelao (2022).
Desde 2005 mantén o blog O funambulista coxo, do que editou unha escolma en papel titulada Retomando a palabra. Das guerras culturais ao crac financeiro (2012). En coautoría con Xurxo Martínez publicou Marxes. Guía ilustrada do Vigo rebelde (2021). Participou en diversos ensaios colectivos e colaborou en numerosos medios de comunicación galegos e estatais. Na actualidade escribe regularmente en Nós Diario e na versión en liña da revista Luzes, na que mantén unha sección de crítica cultural chamada «O bortel». Forma parte dos padroados da Fundación Luzes e da Fundación Galiza Sempre.

Xoán Antón Pérez Lema
Avogado en exercicio dende 1990 e socio-director de PEREZ-LEMA,AVOGADOS E CONSULTORES, S.L. dende 2009. Foi profesor da Universidade de Vigo (2000-2001), da Escola de Práctica Xurídica do Colexio de Avogados (1995-1999) da Coruña e da Escola Galega de Administración Pública (EGAP) a funcionarios de entidades locais (1999-2001). Licenciado en Dereito e letrado asesor de Empresas pola Universidade Pontificia Comillas de Madrid (UPC-ICADE), cursou estudos de doutoramento na Universidade de Santiago de Compostela (“Dereito Publico Galego e Comunitario Europeo”). Exerceu os cargos de secretario xeral de Relacións Institucionais da Vicepresidencia da Xunta de Galicia (novembro 2007-abril 2009) e xefe do Gabinete do conselleiro da Presidencia e Administración Pública da Xunta (1987.1990). Colabora como analista político en moi diversos medios de prensa, entre eles a Radio Galega e a TVG e exerce o cargo de secretario xeral da Asociación Galega de Consumidores e Usuarios (ACOUGA) dende a súa fundación no 2014.