18:00 horas
Presentación
18:15 horas
A trata de seres humanos e escravitudes do século XXI
Teresa Rodríguez Montañés dialoga con Inmaculada Valeije Álvarez
Teresa Rodríguez Montañés
León, 1965. Doutora en Dereito. Escritora, investigadora, consultora nacional e internacional. Experta en dereito penal e dereitos humanos. Na actualidade é catedrática de Dereito Penal da Universidad de Alcalá (UAH). Con anterioridade foi, durante doce anos, letrada do Tribunal Constitucional español.
É autora de catro monografías e máis de corenta artigos, tanto en temas estritamente penais como en cuestións relativas á xurisdición constitucional e dereitos fundamentais. As súas liñas de investigación inclúen delitos de perigo, delincuencia económica, criminalidade empresarial, terrorismo, tortura, aborto, violencia de xénero, liberdade de expresión e tráfico de seres humanos. Durante os últimos dez anos traballou activamente na loita contra o tráfico de seres humanos, non só no ámbito académico, senón colaborando activamente con policía, fiscalía e organizacións non gobernamentais a nivel nacional e internacional. Foi investigadora nos proxectos europeos «The fight against trafficking in human beings in EU: promoting legal cooperation and victims’ protection» e «Psychological Health Impact of THB for sexual exploitation on female victims. Consequences for stakeholders» (PHIT); é membro do programa «Regional Implementation Initiative against Trafficking in Human Beings», que se reúne periodicamente en Viena, e dirixe o Curso de experto na loita contra o tráfico de seres humanos, título propio da UAH e o único curso de posgrao universitario na materia. Desde o ano 2016 comezou a investigar nun novo proxecto denominado «Business and human trafficking», centrado no papel e a responsabilidade das empresas e o mundo dos negocios na prevención e erradicación do comercio de seres humanos e as novas formas de escravitude contemporánea.
Inmaculada Valeije Álvarez
Profesora titular de Dereito Penal e profesora do programa «Jean Monnet» do Centro Europeo de Excelencia da Universidade de Vigo na Facultade de Ciencias Xurídicas e do Traballo. Licenciada en Dereito pola Universidade de Santiago de Compostela (1987), doutora en Dereito pola Universidade da Coruña (1993) e Premio Extraordinario de Doutoramento pola mesma universidade (1994). Ten unha ampla experiencia docente noutras universidades. Entre 1992 e 2003 desempeñou o cargo de conciliadora-mediadora pola provincia de Pontevedra en materias de procedementos extraxudiciais en conflitos de traballo no Consello Galego de Relacións Laborais (Xunta de Galicia). Foi maxistrada suplente do Tribunal Superior de Xustiza de Galicia (1996-1998) e maxistrada suplente da Audiencia Provincial de Pontevedra (2002-2004). Entre 2010 e 2014 foi secretaria xeral da Universidade de Vigo. Desde 2015 é secretaria do Consello de Administración da Editorial Galaxia e desde 2017 secretaria do Padroado da Fundación Penzol.