Dentro da función didáctica e divulgadora do Consello da Cultura Galega, a antiga Sección de Arquitectura promoveu a produción dunha edición de carteis de arquitectos galegos contemporáneos. Unha ferramenta de enorme utilidade enfocada ao público non especializado, docencia de ensino secundario, estudantes, asociacións e organizacións culturais. Este proxecto incide no coñecemento da arquitectura precedente, dos procesos e tendencias mediante os que se acadou o estado da arquitectura actual, tratando así de conseguir un achegamento rigoroso e documentado á arquitectura da nosa contemporaneidade.
Os carteis, deseñados por Xosé Díaz (Imago Mundi), tratan de xuntar elementos visuais, fundamentais para comprender a arquitectura, con textos explicativos nos que se analiza a obra de cada un dos autores, a súa evolución técnica e estilísticas así como os seus postulados teóricos á hora de abordar o feito arquitectónico. Deste xeito, fotografías, planos, maquetas, bosquexos ou vistas en perspectiva combínanse cun texto que aparece reproducido en galego e en inglés, mediante o que se pretende ofrecer unha serie de claves para achegarse á obra de Xosé Bar Boo, Alejandro de la Sota, Andrés Fernández-Albalat, Rafael Baltar, Carlos Almuíña e José Antonio Bartolomé, Manuel Gallego Jorreto, César Portela Fernández-Jardón, Alberto Noguerol e Pilar Díez, Iago Seara Morales, Jesús Irisarri e Guadalupe Piñera e Carlos Quintáns, Cristóbal Crespo e Antonio Raya.