Empregando un formato de conversa e diálogo, EN MODO CONVERSA trata de establecer un espazo de reflexión sobre arte e creación plástica a partir da participación de diferentes profesionais e creadores/as, con formulacións e puntos de vista similares ou posturas contrarias.

Cada encontro consistirá nunha charla entre diferentes axentes da actividade artística: da creación plástica, da crítica, da xestión cultural, do coleccionismo, da dirección de museos e/ou fundacións, da filosofía, da docencia…, a partir dunha serie de temas propostos que permitan establecer unha visión panorámica sobre a situación das artes plásticas na Galicia do século XXI.

A partir dun guión inicial e unha conversa a tres, tratarase de profundar sobre o papel e a influencia dos centros de formación nas novas xeracións de profesionais e artistas. Cales son os intereses do novo estudantado e como estes centros responden a eles. Existe unha relación entre os programas que se estudan e a realidade que atopan as novas xeracións no mundo profesional? Teñen ferramentas sólidas para acometer as súas novas carreiras profesionais?

Nesta primeira actividade participan tres profesionais de longa traxectoria e experiencia profesional, pertencentes a diferentes centros de formación en Galicia —Facultade de Xeografía e Historia, Facultade de Belas Artes e Escola Técnica Superior de Arquitectura—, que exporán os seus puntos de vista e posturas sobre o tema que se vai tratar neste encontro.