O ano 2019 foi declarado Ano Internacional do Sistema Periódico polas Nacións Unidas para conmemorar os 150 anos da publicación, por Dimitri Mendeleev, da súa táboa periódica. Ao fío desta efeméride, a Sección de Ciencia, Tecnoloxía, Natureza e Sociedade do Consello da Cultura Galega, en colaboración co grupo de investigación CienciaNosa e a Secretaría Xeral de Política Lingüística, considera oportuno facer unha profunda reflexión sobre tan importante e transcendente acontecemento. Pretende realizar unha chamada á sociedade e facer deste ano un ano frutífero para toda a ciencia galega.

En 1869 Mendeleev publicaba a súa célebre táboa periódica, na que establecía a súa ordenación dos elementos químicos até entón coñecidos. Isto marcaría un fito de gran relevancia na historia da ciencia xa que, aínda hoxe, se segue a utilizar para facer e construír a química. Por isto, as Nacións Unidas queren conmemorar tan singular acontecemento co obxectivo de que os membros da nosa sociedade, sobre todo os máis novos, coñezan e recoñezan a súa extraordinaria importancia para a ciencia. Tamén, para lembrarlle á sociedade a transcendencia que teñen no mundo actual as ciencias experimentais en xeral e a química en particular. Deste xeito, procuran destacar o papel desempeñado pola química no pasado e subliñar a súa contribución na resolución de todos os problemas que ten a nosa humanidade.

Esta xornada ten como finalidade analizar cal foi o papel desempeñado pola táboa periódica na historia da ciencia e canto achega, na actualidade, o seu coñecemento na formación dos compostos preparados cos elementos químicos que integran este instrumento valioso. Tamén pretende presentar a táboa periódica dun xeito didáctico e lúdico pero, ao tempo, rigoroso para que o alumnado chegue a comprender a súa transcendencia e a valorar, dunha maneira doada, o seu uso e a súa importancia na aprendizaxe da química.