17:00 horas
Presentación

17:15 horas
Conversas Transatlánticas. Escritoras no alén mar
Presenta: María Xosé Porteiro, coordinadora da Comisión de Igualdade do Consello da Cultura Galega

Participan: Mirta Yáñez, María Rosa Lojo e Inmculada López Silva

Mirta Yáñez
Naceu na provincia da Habana, en Cojímar. É unha escritora cubana de amplo recoñecemento en toda América Latina, precisamente o ámbito ao que ten dedicado unha parte moi notable das súas investigacións. Filóloga de formación, ás súas actividades hai que engadir o xornalismo, a crítica literaria, a docencia, a investigación e mesmo ter en conta a súa traxectoria como guionista para cine e televisión. Con preto de corenta libros publicados, na súa escrita atópanse case todos os xéneros literarios. Destaca como narradora, poeta, articulista e tamén como ensaísta, desde onde investigou a fondo todo o que ten que ver con literatura feita por mulleres. Académica da lingua, cunha extensa nómina de premios e recoñecementos ao seu talento e ao seu intenso traballo, participa xenerosamente en múltiples foros internacionais. A emigración é fonte de inspiración para ela nalgunha das súas obras. Tivo tres avós galegos e unha avoa asturiana, e do seu vínculo con Lugo, unha das súas terras de referencia, débese que fose promotora da creación da Asociación de Fillos de Baleira en Cuba.

María Rosa Lojo
Naceu en Bos Aires e é filla dun exiliado republicano. A súa voz literaria é unha das máis notábeis no ámbito hispanoamericano, sen deixar de participar na escrita en galego, lingua na que ten varias obras publicadas. A súa obra abrangue distintos xéneros: artigos, poesía, ensaio, conto e novela. En Galaxia ten publicada a novela A fin da terra e o fermoso álbum O libro das Seniguais e do único Senigual, e tanto Galicia como a cuestión migratoria forman parte das súas inquietudes literarias. María Rosa Lojo é tamén docente e investigadora do CONICET (Consello Nacional de Investigacións Científicas e Técnicas), con sede na Universidade de Bos Aires. Dirixe dous proxectos de investigación na Universidade do Salvador onde dita, ademais, un Seminario-Taller de Doutoramento. Ten ao seu cargo a coordinación do equipo internacional de investigadores que realiza a edición crítica de Sobre héroes y tumbas para a Colección Arquivos da UNESCO.

Inmaculada López Silva
Naceu en Compostela. Escritora e crítica teatral, filóloga de formación, profesora de Arte Dramática, membro do Consello da Cultura Galega, publica en revistas especializadas galegas e de ámbito internacional. Autora de varios ensaios sobre teatro, tradutora de Camus e Genet, columnista de opinión, como narradora deuse a coñecer en 1996. Desde aquela xa ten unha obra prolífica e premiada co recoñecemento da crítica e do público. En 2016 publicou a súa máis recente novela, Aqueles días en que eramos malas. Frecuente participante en encontros internacionais, coñece ben a moitas das súas colegas do exterior, onde tamén é coñecida e estimada. É unha das figuras máis destacadas do panorama literario galego, no que representa moi ben a eclosión de autoras novas que están a caracterizar unha outra xeira para a literatura no noso país.